საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ შვეიცარიის მითოდრამის ასოციაციასთან ურთიერთთანამშრომლობის მემორანდუმი გააფორმა.
მემორანდუმი ითვალისწინებს დევნილი მოსახლეობის ფსიქოლოგიურ დახმარებას; დევნილი ბავშვებისა და მოზარდებისთვის რეაბილიტაციის პროგრამებსა და მითოდრამის სფეროში სპეციალისტების მომზადებას.
როგორც მინისტრის მოადგილე ნინო ჭავჭავაძემ აღნიშნა, მემორანდუმი ხელს შეუწყობს დევნილებისა და ლტოლვილებს ფსიქო-სოციალურ რეაბილიტაციას და დაეხმარება მათ სტრესთან გამკლავებაში: „დევნილ ბავშვთა დახმარების პროექტის ფარგლებში ხელი მოვაწერეთ თანამშრომლობის მემორანდუმს, შვეიცარიის ქალაქ ბერნის ფსიქოლოგიურ ცენტრთან, რომლის წარმომადგენლები ქართველ კოლეგენთან ერთად დევნილ ბავშვებს დაეხმარებიან სტრესული მდგომარეობიდან გამოსვლაში. ეს არის საერთაშორისო თანამეგობრობის კეთილგანწყობის კიდევ ერთხელ დაფიქსირება ჩვენი ქვეყნის მიმართ."
ფსიქოლოგიურ მეცნიერებათა დოქტორის, ციურიხის უნივერსიტეტის პროფესორისა და შვეიცარიის მითოდრამის ასოციაციის პრეზიდენტის alan gugenbuliს თქმით, მითოდრამის მჯეთოდი აპრობირებული მეთოდია, რომელიც დანერგილია აშშ-ის, შვეიცარიის, შვედეთისა და იაპონიის განათლების, ჯანდაცვის და სასჯელაღსრულების სისტემებში. მისივე თქმით, მითოდრამა ეხმარება ბავშვებსა და მოზარდებს პრობლემების დაძლევასა და საკუთარი თავის რეალიზებაში.
დევნილთა სამინისტროს მხრიდან მემორანდუმს ხელი მინისტრის მოადგილე ნინო ჭავჭავაძემ მოაწერა, შვეიცარიის მხრიდან კი შვეიცარიელმა ფსიქოლოგმა და ფსიქოთერაპევტმა ალან გუგენბიულმა, რომელმაც აღნიშნული მეთოდი შეიმუშავა. მემორანდუმის ხელმომწერი ასევე გახლავთ მედიცინის მეცნიერებათა დოქტორი. საქართველოს ჯგუფური ფსიქოპთერაპიის ასოციაციის პრეზიდენტი რეზო კორინთელი.