1 მაისს 12:00 საათზე "პრაიმ თაიმის" პრეს კლუბში ეროვნული ბიბლიოთეკის გენერალური დირექტორი გიორგი კეკელიძე ამერიკის შეერთებულ შტატების ვიზიტთან დაკავშირებით პრესკონფერენციას გამართავს. ვიზიტი 20-30 აპრილს შედგა.
ამერიკის კონგრესის ბიბლიოთეკაში გიორგი კეკელიძის პოეზიის საღამო გაიმართა. ის პირველი ავტორია საქართველოდან, რომელიც კონგრესის ბიბლიოთეკის აუდიტორიის წინაშე წარდგა. შეხვედრის შემდეგ გიორგი კეკელიძე დამსწრე საზოგადოებას საქართველოს ლიტერატურის ისტორიაზე ესაუბრა. დაიგეგმა მისი ლექსების ინგლისურ ენაზე თარგმნა.
გიორგი კეკელიძე კონგრესის ბიბლიოთეკის დირექტორს ჯეიმს ბილინგტონს და მსოფლიო დიგიტალაზიციის ორგანიზაციის მენეჯერს ჯონ უდერანენს შეხვდა. შეხვედრაზე მიღწეული შეთანხმების თანახმად ბიბლიოთეკების დახურული ელექტრონული ბაზები ორივე მხარისთვის გახდება ხელმისაწვდომი. ეროვნული ბიბლიოთეკის თანამშრომლები კონგრესის ბიბლიოთეკაში კვალიფიკაციის ასამაღლებელ კურსებს რამდენიმე მიმართულებით გაივლიან. ეროვნული ბიბლიოთეკის გენერალური დირექტორი ვიზიტის ფარგლებში კონგრესის ბიბლიოთეკის სხვადასხვა განყოფილების უფროსებსაც შეხვდა და სამომავლო გეგმები დაისახა. ასევე გაიმართა შეხვედრა ვაშინგტონში ქართველი ემიგრანტების შთამომავლებთან, რომელთაც ქართულ მხარეს მნიშვნელოვანი საარქივო მასალები გადასცეს.
ამერიკიდან ჩამოტანილი უნიკალური მასალები ეროვნული ბიბლიოთეკის ახლადგახსნილ ემიგრაციის დარბაზს გადაეცემა.
ვიზიტის ფარგლებში გიორგი კეკელიძე ბოსტონში ცნობილი ქართველი ემიგრანტის ოთარ ზალდასტანიშვილის შვილს ლიზი ზალდასტანს შეხვდა. ქალბატონმა ლიზიმ ეროვნულ ბიბლიოთეკას მამის უნიკალური არქივი გადასცა.
ოთარ ზალდასტანიშვილი იყო ამერიკაში მცხოვრები ერთ-ერთი ყველაზე ცნობილი და წარმატებული ქართველი ემიგრანტი, ჰარვარდის უნივერსიტეტის პროფესორი, მსოფლიოს მერვე საოცრებად წოდებულ "პალმა ჯუმეირას" დამპროექტებელი. იგი წლების მანძილზე ხელმძღვანელობდა ნიუ-იორკში არსებულ "საქართველოს ასოციაციას". ოთარ ზალდასტანიშვილის არქივი ერთ-ერთი ყველაზე დიდი ამერიკული ემიგრანტული მასალაა საქართველოს შესახებ და ეს მასალები უახლოეს მომავალში ეროვნული ბიბლიოთეკის ფონდების ნაწილი გახდება.
უნიკალურ საარქივო მასალებს შორის არის ოთარ ზალდასტანიშვილის წიგნები, ჟურნალები, წერილები, ხელნაწერები, რომელსაც ცნობილი არქიტექტორი წლების განმავლობაში აგროვებდა.
არქივი ეროვნულ ბიბლიოთეკას რუსუდან გორგილაძის დახმარებით გადმოეცა.