"ოდნავი ნიჭიერება რომ ჰყოფნოდა, "საერთო სასამართლოების" შესახებ კანონპროექტზე ვეტოს დადება არ უნდა ეკადრებინა" , - ამის შესახებ საქართველოს პრემიერ მინისტრმა ბიძინა ივანიშვილმა რუსთავი 2-ის გადაცემა "პოზიციაში" განაცხადა და დასძინა, რომ კანონპროექტის მიღება არა ქვეყნის, არამედ "ნაციონალური მოძრაობის" ინტერესებს ეწინააღმდეგება.
პრემიერმა აღნიშნა, რომ პარლამენტი ვეტოს გადალახავს.
"ჩვენ გადავლახავთ ამ ვეტოს. სააკაშვილს ოდნავი ნიჭიერება რომ ჰყოფნოდა, არ უნდა ეკადრებინა ეს, რამეთუ ყველას მოსწონს სასამართლო რეფორმა, მაგრამ გამოვიდა ერთი კაცი და თავხედურად ვეტო დაადო, რითაც აჩვენა, რომ ეს კანონპროექტი მის ინტერესებს ეხება და არა ქვეყნისას. მაინც ვერ შეძლებენ ამ პროცესის დაბლოკვას, ყველაფერს გავაკეთებთ, რომ მივიღოთ რეალურად დამოუკიდებელი სასამართლო. სამართლიანობა აუცილებლად იზეიმებს", - განაცხადა ბიძინა ივანიშვილმა.
