,,ვეტოს გამოყენება პრეზიდენტის დისკრეციული უფლებამოსილებაა", -განაცხადა ჟურნალისტებთან უზენაესი სასამართლოს თავმჯდომარემ კოტე კუბლაშვილმა მიხეილ სააკაშვილის გადაწყვეტილების კომენტირებისას და აღნიშნა, რომ პრეზიდენტს უფლება აქვს შესაბამის კანონპროექტს საჭიროების შემთხვევაში ვეტო დაადოს.
"განურჩევლად იმისა, თუ რას ფიქრობს უზენაესი სასამართლო, პარლამენტი თუ მთავრობა. პრეზიდენტს აქვს უფლება ის გამოიყენოს და ვეტო დაადოს შესაბამის კანონპროექტს თუ ამას საჭიროდ ჩათვლის. ამიტომ ხელისუფლების ვერც ერთი წარმომადგენელი-ვერც სასამართლო და ვერც აღმასრულებელი ხელისუფლებიდან და ვერც საკანონმდებლო ხელისუფლება ვერ ჩაერევა პრეზიდენტის მიერ ამ უფლების გამოყენებაში", -განაცხადა კუბლაშვილმა და აღნიშნა, რომ არ შეიძლება პოლიტიკური ხელისუფლების ცვლილებას მოჰყვეს სასამართლო ხელსუფლების ცვლილებაც.
შეგახსენებთ, რომ პრეზიდენტმა პარლამენტის მიერ მიღებულ ორ კანონპროექტს, რომელიც ეხება საქართველოს იუსტიციის უმაღლესი საბჭოს დაკომპლექტებას და საბჭოს მოქმედი შემადგენლობისთვის უფლებამოსილების ვადამდე შეწყვეტას, მეორე კანონპროექტი კი ბრალდებულის უფლების შეზღუდვას, თავად აირჩიოს მის მიმართ მიმდინარე სისხლის სამართლის საქმე განხილულ იქნას ნაფიც მსაჯულთა სასამართლოს მიერ თუ მის გარეშე, ვეტო დაადო.
