"აფხაზეთის რესპუბლიკის ქართული მოსახლეობის უმრავლესობას აფხაზეთის მოქალაქეობა "აფხაზეთის მოქალაქეობის შესახებ" კანონის დარღვევით აქვს მინიჭებული", _ ნათქვამია ოკუპირებულ აფხაზეთში მოქმედი პოლიტიკური პარტია "აფხაზეთის სახალხო ერთიანობის ფორუმი"-ს მიერ გავრცელებულ განცხადებაში. ინფორმაციას ამ შესახებ აფხაზური მედია ავრცელებს.
"ბოლო დროს, აფხაზეთის ხელისუფლება აქტიურ მუშაობას ატარებს გალის რაიონის მოსახლეობის პასპორტიზაციისათვის. ანალოგიური მუშაობა მიმდინარეობს ტყვარჩელისა და ოჩამჩირის რაიონებში - ქართული მოსახლეობის კომპაქტური ჩასახლების რაიონებში",_ ნათქვამია განცხადებაში და იქვე აღნიშნულია, რომ 2008 წლიდან გალის რაიონში მცხოვრები ქართული ეროვნების მოსახლეობისათვის გაცემულია 16096 ე.წ. აფხაზური პასპორტი, ტყვარჩელის რაიონში 6217 ე.წ. პასპორტი, ხოლო ოჩამჩირის რაიონში 2453 ე.წ. პასპორტი.
განცხადების მიხედვით, აფხაზეთის ე.წ. მოქალაქეობა ენიჭება ადამიანს, რომელიც ე.წ. დამოუკიდებლობის აქტის მიღების შემდეგ ხუთი წლის განმავლობაში ცხოვრობდა აფხაზეთის ტერიტორიაზე.
"აფხაზეთის ტერიტორიაზე მცხოვრები ქართული მოსახლეობის უმრავლესობა კი ქართულ აფხაზური კონფლიქტის დასრულების შემდეგ საკმაოდ დიდი ხნის განმავლობაში არ ცხოვრობდა აფხაზეთის ტერიტორიაზე, ისინი საქართველოს ტერიტორიაზე იმყოფებოდნენ და მისი მოქალაქეობა მიიღეს, ამით კი მათ იმის დემონსტრირება მოახდინეს, რომ ახლადწარმოქმნილ აფხაზურ სახელმწიფოს არ აღიარებდნენ",_ ნათქვამია ფორუმის განცხადებაში და ხაზგასმით აღნიშნულია, რომ მოქმედი კანონმდებლობის თანახმად, პირებმა, რომლებიც აფხაზეთში დაბრუნდნენ მოქალაქეობის აღდგენისა და გაფორმების პროცედურა უნდა გაიარონ, ხოლო ამაში კი წინა მოქალაქეობაზე უარის თქმა შედის.
"ქართულ მოსახლეობას კი პირდაპირი წესით აძლევენ მოქალაქეობას კანონმდებლობის სრული იგნონირებით", _ წერს აფხაზური მედია.
პარტია ე.წ. პრეზიდენტიდან და ე.წ. პარლამენტიდან მოითხოვს "შეაჩერონ აფხაზური პასპორტების დარიგების პროცესი".