,,პრეზიდენტსა და მის გუნდს სასამართლოებში არსებული მდგომარეობის შეცვლა არ სურთ", _განაცხადა ჟურნალისტებთან პარლამენტის თავმჯდომარემ დავით უსუფაშვილმა პრეზიდენტის გადაწყვეტილების კომენტირებისას და აღნიშნა, რომ პარლამენტი ვეტოს წარმატებით დაძლევს.
,,ჩვენ მიერ მიღებული კანონები სასარგებლოა ქვეყნისთვის, სასამართლოსთვის, რაზეც ძალიან პირდაპირ და მკაფიოდ მიუთითებს ყველა, მათ შორის ვენეციის კომისიაც. მოგეხსენებათ, რომ პრეზიდენტის ერთადერთი არგუმენტი, რისთვის ეს რეფორმა დაბლოკა და შეაფერხა, არის ის, რომ თითქოს ვენეციის კომისიის დასკვნები არ გავიზიარეთ. ყველამ მოისმინეთ ვენეციის კომისიის პრეზიდენტის გუშინდელი განცხადება იმის შესახებ, რომ ვენეციის კომისია ცვლილებებს მიესალმება და თვლის, რომ რეფორმა სწორი მიმართულებით მიმდინარეობს და ეს დიდი ხანია გასაკეთებელი იყო. არგუმენტი მიხეილ სააკაშვილსა და "ნაციონალურ მოძრაობას" არ აქვთ, გარდა იმისა, რომ მათ არ სურთ შეიცვალოს მდგომარეობა სასამართლოებში", -განაცხადა უსუფაშვილმა.
შეგახსენებთ, რომ პრეზიდენტმა პარლამენტის მიერ მიღებულ ორ კანონპროექტს, რომელიც ეხება საქართველოს იუსტიციის უმაღლესი საბჭოს დაკომპლექტებას და საბჭოს მოქმედი შემადგენლობისთვის უფლებამოსილების ვადამდე შეწყვეტას, მეორე კანონპროექტი კი ბრალდებულის უფლების შეზღუდვას, თავად აირჩიოს მის მიმართ მიმდინარე სისხლის სამართლის საქმე განხილულ იქნას ნაფიც მსაჯულთა სასამართლოს მიერ თუ მის გარეშე, ვეტო დაადო.
