რუსეთის საგარეო საქმეთა მინისტრის მოადგილე გრიგორი კარასინი რუსეთის ფედერაციასთან ურთიერთობის საკითხებში საქართველოს პრემიერ-მინისტრის წარმომადგენელს ზურაბ აბაშიძეს ტელეფონით ესაუბრა. ინფორმაციას ამის შესახებ რუსეთის საგარეო საქმეთა სამინისტრო ავრცელებს.
"მხარეებმა ისაუბრეს ურთიერთქმედებაზე ორმხრივი ურთიერთობების რიგ სფეროებში. ვაჭრობის სფეროში აღინიშნა წინ წაწევა როსპოტრებნადზორისა და როსსელხოზნადზორის მიმართულებით რუსეთის ბაზარზე ქართული ღვინოების, მინერალური წყლისა და სოფლის მეურნეობის პროდუქტების დაბრუნების საკითხში.
მხარეები ასევე მიესალმნენ ჰუმანიტარული კავშირების აქტივიზაციას. გამოითქვა კმაყოფილება იმასთან დაკავშირებით, რომ მიღწეულია შეთანხმება "ზემო ლარსი"-"ყაზბეგის" გამშვები პუნქტის სადღეღამისო მუშაობის შესახებ საერთო საზღვარზე მიმდინარე წლის 1 ივნისიდან 30 სექტემბრამდე პერიოდში", _ იუწყება რუსეთის საგარეო უწყება.
მათივე ინფორმაციით, კარასინმა და აბაშიძემ ასევე განიხილეს საკითხები თავიანთი ახალი შეხვედრის შესახებ, რომელიც მიმდინარე წლის ივნისის პირველ რიცხვებში უნდა გაიმართოს.
