11 აპრილს, აჭარის ა/რ მთავრობის თავმჯდომარე არჩილ ხაბაძე უკრაინაში, ქალაქ ოდესაში მიემგზავრება. როგორც სააგენტო "ჯი-ეიჩ-ენს" აჭარის მთავრობიდსან აცნობეს, ოფიციალური ვიზიტის ფარგლებში გაიმართება შეხვედრები ოდესის ოლქის ადმინისტრაციის ხელმძღვანელთან ედუარდ მატვიიჩუკთან, ქ.ოდესის მერთან ალექსეი კოსტუსევთან, ნიკოლაევის ოლქის საბჭოს თავმჯდომარესთან იგორ დიატლოვთან და ოდესა-იზმაილის ეპარქიის მიტროპოლიტ აგათანგელთან.
არჩილ ხაბაძე და ოდესის ოლქის სახელმწიფო ადმინისტრაციის ხელმძღვანელი ხელს მოაწერენ თანამშრომლობის მემორანდუმს, რომლის მიხედვითაც 2013-2014 წლებში დაგეგმილია ერთობლივი სავაჭრო-ეკონომიკური, ტურისტული, საგანმანათლებლო და კულტურული ღონისძიებები. მათ შორის, უკრაინის ოდესის ოლქის სახელმწიფო ადმინისტრაციასა და აჭარის მთავრობას შორის სავაჭრო-ეკონომიკური, სამეცნიერო-ტექნიკური და ჰუმანიტარული თანამშრომლობის ხელშეკრულების პროექტის მომზადება; აჭარის და ოდესის დელეგაციების მონაწილეობა სასოფლო-სამეურნეო პროდუქციისა და ტექნოლოგიების გამოფენებსა და ბიზნეს ფორუმებში; მცირე და საშუალო საწარმოების სავაჭრო-ეკონომიკურ ღონისძიებებში მონაწილეობის მხარდაჭერა; ინფორმაციის გაცვლა სასწავლო პროცესში ახალი საგანმანათლებლო და ინფორმაციული ტექნოლოგიების დანერგვაზე; სამედიცინო მუშაკებს შორის თანამშრომლობის განვითარება; აჭარის სოფლის მეურნეობის პროდუქციის (ჩაი, ციტრუსები, სუბტროპიკული კულტურები, წვენები და კონცენტრატები, ალკოჰოლური სასმელები და სხვა) ოდესის ოლქში ექსპორტის ხელშეწყობა; ტურისტების ერთობლივი მომსახურების პროგრამების ჩამოყალიბება.
ვიზიტის ფარგლებში არჩილ ხაბაძე დაესწრება საერთაშორისო ფორუმს „Odesaa FDI Forum 2013" რომელზეც განიხილება შემდეგი თემები: ინვესტიციების მოზიდვა ინფრასტრუქტურულ პროექტებში - არსებული პრობლემები, ახალი მეთოდები და გადაწყვეტილებები; ენერგო რესურსების ინფრასტრუქტურაში ინვესტირება; ინვესტიციები საპორტო სექტორში.
ოფიციალური ვიზიტი 3 დღეს გაგრძელდება.
