დავით დარახველიძემ ამერიკის მოსახლეობის, ლტოლვილთა და მიგრაციის ბიუროს დელეგაციასთან სამუშაო შეხვედრა გამართა. დელეგაციის წევრები ძირითადად დაინტერესდნენ სამინისტროს ახალი ხელმძღვანელობის ხედვებით, გეგმებითა და პრიორიტეტებით, რომელიც იძულებით გადაადგილებულ მოსახლეობასთან დაკავშირებით არსებობს.
ამერიკის მოსახლეობის, ლტოლვილთა და მიგრაციის ბიუროს ევროპისა და ცენტრალური აზიის დირექტორის მოადგილემ ნენსი ირისმა დავით დარახველიძესთან საუბრისას აღნიშნა, რომ საქართველო ერთადერთი ქვეყანაა, რომელიც დევნილ მოსახლეობას სერიოზულ ყურადღებას აქცევს. მისივე თქმით, საქართველოს შემდეგ არის კოლუმბია. „მივესალმები იმ ინტერესს, რომელსაც ახალი მთავრობა იჩენს დევნილ მოსახლეობასთან დაკავშირებით. შეხვედრა მქონდა თქვენს პარტნიორებთანაც, რომლებიც დადებითად აფასებენ სამინისტროს მუშაობას და ამბობენ, რომ საქმე წინ და წინ მიდის"- აღნიშნა შეხვედრაზე ნენსი ირისმა.
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ სტუმრებს სამინისტროში მიმდინარე პროცესები გააცნო და მთავარი პრობლემებისა და საჭიროებების შესახებ ამომწურავი ინფორმაცია მიაწოდა. როგორც მინისტრმა აღნიშნა, დევნილთა ძირითადი საჭიროებები მიღების დღეებზე გამოიკვეთა.
„ჩვენ სამინისტროში დავაწესეთ დევნილთა მიღების დღეები და როგორც მე, ისე მოადგილეები დევნილებს ყოველდღიურ რეჟიმში ვხვდებით და საჭიროებებს პირადად დევნილებისგან ვეცნობით. 90 000 დევნილი ოჯახიდან 25 000 ოჯახს გააჩნია საცხოვრებელი ბინა. 40 000 ოჯახს კი ბინის გადაუდებელი აუცილებლობა აქვს. მიღებაზე 10-დან 8 დევნილი კერძო სექტორიდანაა. დევნილთა მთავარი პრობლემა სწორედ საცხოვრებელი ბინებია, შემდეგ მოდის დასაქმება და შემოსავლის წყარო, შემდეგ კი ჯანმრთელობის პრობლემები, განათლება და სხვა" - აღნიშნა დავით დარახველიძემ.
მინისტრმა ასევე აღნიშნა, რომ დევნილთა ნდობა სამინისტროს მიმართ იზრდება და ციფრებიც დაასახელა, 4 თვეში რამდენი ოჯახის ბინით დაკმაყოფილება მოხერხდა: „4 თვეში 308 დევნილ ოჯახს გადავეცით ბინა, 300-ზე მეტ ოჯახს, რომლებმაც სახელმწიფოსგან ფართი მიიღეს, თუმცა საკუთრებაში არ ჰქონდათ, ეს ბინები დავუკანონეთ, მათ საკუთრებაში გადავეცით. დევნილი მოსახლეობის ბინით უზრუნველსაყოფად ვმუშაობთ როგორც მშენებლობების კუთხით, ისე კარკასული ობიექტების რეაბილიტაციის მიმართულებით."
მინისტრმა სტუმრებს დევნილთა განსახლების ახლად შემუშავებული კრიტერიუმებიც გააცნო, რომლის მიხედვითაც დევნილი მოსახლეობა საცხოვრებელ ბინებს მიიღებს.
როგორც დელეგაციის წევრებმა აღნიშნეს, ამერიკა საქართველოს მეგობრად რჩება და ეს მეგობრობა და თანამშრომლობა მომავალშიც გაგრძელდება. მინისტრმა დავით დარახველიძემ კი აღნიშნა, რომ პრობლემის საბოლოო მოგვარება დევნილი მოსახლეობის საკუთარ სახლებში დაბრუნება იქნება.
შეხვედრას ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პირველი მოადგილე გოგი ფაცაცია და მინისტრის მოადგილე ნინო ჭავჭავაძე დაესწრო.
