"საგადასახადო კოდექსში" ცვლილებები შედის, რომლის მიხედვითაც, აჭარაში ფიზიკურ პირთა საკუთრებაში არსებული 5 ჰექტარამდე ფართობის სასოფლო-სამეურნეო დანიშნულების მიწების მიწის გადასახადისაგან განთავისუფლება. "საგადასახადო კოდექსში" შესატანი ცვლილებები, აჭარის უმაღლესი საბჭოს მიერ ქვეყნის საკანონმდებლო ორგანოში უკვე ინიცირებულია და ამჟამად საკომიტეტო მოსმენები მიმდინარეობს. როგორც კანონპროექტის განმარტებით ბარათშია აღნიშნული, ცვლილების მიზეზია ფიზიკურ პირთა საკუთრებაში არსებული 5 ჰექტარამდე ფართობის სასოფლო-სამეურნეო დანიშნულების მიწების მიწის გადასახადისაგან განთავისუფლება და გადასახადით დაბეგვრაში არსებული უთანაბრობის აღმოფხვრა, რომელიც დაკავშირებულია 2004 წლის 1 მარტამდე ფიზიკურ პირთა საკუთრებაში არსებულ 5 ჰექტარამდე ფართობის სასოფლო-სამეურნეო დანიშნულების მიწის ნაკვეთების გადასახადისაგან განთავისუფლებასა და აღნიშნული დროის - 2004 წლის 1 მარტის შემდგომ პერიოდში ფიზიკური პირების საკუთრებაში გადაცემული სასოფლო-სამეურნეო დანიშნულების მიწების მიწის გადასახადით დაბეგვრასთან.
"საგადასახადო კოდექსის" 206-ე მუხლის პირველი ნაწილის ,,ტ)" ქვეპუნქტი ყალიბდება ახალი რედაქციით, რამდენადაც საქართველოს საგადასახადო კოდექსის 206-ე მუხლის პირველი ნაწილის ტ) ქვეპუნქტის მოქმედი რედაქციის პირობებში საქართველოს სხვა დანარჩენ რეგიონებთან შედარებით ფაქტობრივად დისკრიმინაციულ მდგომარეობაში იმყოფებიან აჭარის რეგიონის მოსახლეობის - ფიზიკური პირების ის ნაწილი, რომლებსაც საკუთრებაში 5 ჰექტარამდე სასოფლო-სამეურნეო დანიშნულების მიწები მიღებული და კანონის შესაბამისად საკუთრებაში დარეგისტრირებული აქვთ 2004 წლის 1 მარტის შემდეგ. აღნიშნულ მდგომარეობაში აღმოჩნდებიან აგრეთვე ის ფიზიკური პირები, რომლებსაც მომავალში აჭარაში მიწის რეფორმის გაგრძელების შემდეგ საკუთრებაში გადაეცემათ სასოფლო-სამეურნეო დანიშნულების მიწები და ისინი არ თავისუფლდებიან 2004 წლის 1 მარტის შემდეგ საკუთრებაში მიღებულ მიწებზე მიწის გადასახადისაგან"- ნათქვამია კანონპროექტის განმარტებით ბარათში.
როგორც აჭარის უმაღლეს საბჭოში განმარტავენ, აღნიშნული პრობლემა ფაქტობრივად იმით არის განპირობებული, რომ საქართველოში (გარდა აჭარის ავტონომიური რესპუბლიკის რეგიონისა) 2004 წლის 1 მარტის მდგომარეობით დასრულებული იყო მიწის რეფორმა. შესაბამისად იურიდიულ და ფიზიკურ პირებს საკუთრებაში დაკანონებული ჰქონდათ სასოფლო-სამეურნეო დანიშნულების მიწები.
"აჭარის ავტონომიური რესპუბლიკის რეგიონში კი ცნობილი პოლიტიკური ვითარების პირობებში, აჭარის ავტონომიური რესპუბლიკის ყოფილი ხელისუფლების მიერ 1992-2004 წლებში მიწის რეფორმის ხელოვნურად გაჭიანურების გამო აღნიშნული პერიოდისათვის მიწის რეფორმა ფაქტობრივად განუხორციელებელი დარჩა. შედეგად აჭარაში მიწათსარგებლობის საქმეში ჩამოყალიბდა საქართველოს სხვა რეგიონებისაგან განსხვავებული მდგომარეობა (განსაკუთრებით ქობულეთისა და ხელვაჩაურის მუნიციპალიტეტებში), მიწის რეფორმა აჭარაში ფაქტობრივად დღესაც არ არის დასრულებული.
ყოველივე აღნიშნულიდან გამომდინარე საგადასახადო კოდექსის 206-ე მუხლის პირველი ნაწილის ,,ტ)" ქვეპუნქტის მოქმედი რედაქცია ფაქტობრივად არათანაბარ მდგომარეობაში აყენებს აჭარის რეგიონის იმ ფიზიკურ პირებს, რომლებმაც მათგან დამოუკიდებელი მიზეზების გამო დროულად ვერ მიიღეს საკუთრებაში სასოფლო-სამეურნეო დანიშნულების მიწები და მათი საკუთრებაში დარეგისტრირება მოახერხეს 2004 წლის 1 მარტის შემდეგ, ან კიდევ მიწებს საკუთრებაში დაირეგისტრირებენ ახლო მომავალში აჭარაში მიწის რეფორმის გაგრძელების შემდეგ.
აღნიშნული არათანაბარი მდგომარეობის დაძლევის და საერთოდ სოფლის მეურნეობის განვითარებისა და ხელშეწყობის მიზნით კანონპროექტით ცვლილება შედის საქართველოს საგადასახადო კოდექსის 206-ე მუხლის პირველი ნაწილის ,,ტ)" ქვეპუნქტში, რომლის შესაბამისადაც საგადასახადო კოდექსის 206-ე მუხლის პირველი ნაწილის ,,ტ)" ქვეპუნქტში არსებული დათქმული ვადა ,,2004 წლის პირველ მარტის მდგომარეობით" ამოღებული იქნება და იგი ახალი რედაქციით თარიღის დათქმის პირობის გარეშე ჩამოყალიბდება, რითაც ფაქტობრივად აღმოიფხვრება ზემოთაღნიშნული არათანაბარი მდგომარეობა და სოფლის მეურნეობის განვითარებისა და სტიმულირების მნიშვნელოვანი ხელშეწყობაც იქნება.
იმის გათვალისწინებით, რომ წარმოდგენილი კანონპროექტით ხდება მიწის გადასახადის დასაბეგრი ბაზის ოდენობის გარკვეულწილი შემცირება, აღნიშნული აისახება სახელმწიფო ბიუჯეტის საშემოსავლო ნაწილზე, თუმცა აჭარის რეგიონში არსებული მცირემიწიანობის პირობებში, მთლიანად ქვეყნის მასშტაბით იგი მნიშვნელოვან გავლენას ვერ მოახდენს სახელმწიფო ბიუჯეტის შემოსავალზე"- აღნიშნულია კანონპროექტის განმარტებით ბარათში.
