,,ჩვენ ქვეყანას ეკუთვნის იცოდეს რა პირობებში გარდაიცვალა მისი პრემიერ-მინისტრი", - განაცხადა ,,მაესტროს" პრესკლუბში სტუმრობისას იუსტიციის მინისტრმა თეა წულუკიანმა, ყოფილი პრემიერის ზურაბ ჟვანიას საქმის კომენტირებისას.
წულუკიანის განცხადებით, ხელისუფლება მაქსიმუმს გააკეთებს სიმართლის დასადგენად.
,,ჟვანიას საქმე იყო არის და იქნება ჩვენთვის ერთ-ერთი ყველაზე მაღალი პრიორიტეტი, რადგან ჩვენ ქვეყანას ეკუთვნის იცოდეს რა პირობებში გარდაიცვალა მისი პრემიერ-მინისტრი რომლის ხსოვნისადმი საზოგადოება დიდი მოწიწებითაა გამსჭვალული. Aამიტომ არცერთ ჩვენს რესურს არ დავიშურებთ იმისთვის, რომ ჟვანიას საქმესთან დაკავშირებით სიმართლე დადგინდეს", - განაცხადა ჟურნალისტებთან თეა წულუკიანმა, რომელმაც აღნიშნა, რომ ზურაბ ჟვანიას საქმის გამოძიებასთან დაკავშირებით მისი ოჯახიც მიიღებს მონაწილეობას.
,,არ შეიძლება რომელიმე გამოძიებაში, სადაც საქმე ადამიანის სიცოცხლის ხელყოფას ეხება ოჯახი, ან დაზარალებულის უფლებამონაცვლე არ იყოს ჩართული. ჩვენ ამას უზრუნველყოფთ, მიუხედავად იმისა, რომ კანონი ამას არ გვავალდებულებს", - განაცხადა წულუკიანმა.
შეგახსენებთ, რომ ყოფილი პრემიერის ძმის გოგლა ჟვანიას განცხადებით, ზურაბ ჟვანიას გარდაცვალების საქმის გამოძიება განახლდა.მისი თქმით, იგი პროკურატურაში მიმდინარე გამოძიების ფარგლებში დაკითხვაზე იმყოფებოდა. ჟვანია ამბობს, რომ მან პროკურატურას მის ხელთ არსებული მასალები გადასცა.
