„ აღნიშნულთან დაკავშირებით გაცნობებთ, რომ საქართველოს კანონმდებლობის გათვალისწინებით, სამინისტრო ვერ დაეთანხმება თქვენს მიერ ცალმხრივად მიღებულ გადაწყვეტილებას შემდეგი გარემოებების გათვალისწინებით:

ა) „საქართველოს დედაქალაქის - თბილისის შესახებ" საქართველოს კანონის მე-9 მუხლის შესაბამისად, დადგენილია სახელმწიფოსა და დედაქალაქის ერთობლივ კომპეტენციას მიკუთვნებულ საკითხთა ნუსხა, რომელთა შორის დედაქალაქის მასშტაბით ტრანსპორტით უზრუნველყოფის საკითხი გათვალისწინებული არ არის. ამავე კანონის მე-91 მუხლის მე-2 პუნქტის „ი" ქვეპუნქტის თანახმად კი, ადგილობრივი სამგზავრო გადაყვანის ორგანიზება, მართვა და რეგულირება წარმოადგენს ქალაქ თბილისის თვითმმართველობის საკუთარ უფლებამოსილებას, რომელსაც ახორციელებს საქართველოს კანონმდებლობით დადგენილი წესით, დამოუკიდებლად და საკუთარი პასუხისმგებლობით (მე-91 მუხლის პირველი პუნქტი);

ბ) „საქართველოს დედაქალაქის - თბილისის შესახებ" საქართველოს კანონის 231 მუხლის „ო" და „პ" ქვეპუნქტების საფუძველზე, საქართველოს კანონმდებლობით მინიჭებული უფლებამოსილების ფარგლებში, საგზაო მოძრაობისა და მოსახლეობის სამგზავრო ტრანსპორტით მომსახურების ორგანიზება, ასევე დედაქალაქის ადმინისტრაციულ საზღვრებში ადგილობრივი საქალაქო რეგულარული სამგზავრო გადაყვანის მიზნით ავტობუსების (M2 და M3 კატეგორიები) მოძრაობის მარშრუტების დადგენა და დამტკიცება წარმოადგენს ქალაქ თბილისის მთავრობის უფლებამოსილებას;

გ) „ადგილობრივი თვითმმართველოს შესახებ" საქართველოს ორგანული კანონის მე-16 მუხლის (თვითმმართველი ერთეულის საკუთარი უფლებამოსილებები) მე-2 პუნქტის „მ" ქვეპუნქტის შესაბამისად, საქართველოს კანონმდებლობით მინიჭებული უფლებამოსილების ფარგლებში, საგზაო მოძრაობისა და ავტოსატრანსპორტო გადაყვანის რეგულირება, კანონით დადგენილი ნებართვების გაცემა და მოსახლეობის სამგზავრო ტრანსპორტით მომსახურების ორგანიზება წარმოადგენს თვითმმართველი ერთეულის ექსკლუზიურ, საკუთარ უფლებამოსილებას, რომელსაც იგი ახორციელებს კანონით დადგენილი წესით, დამოუკიდებლად და საკუთარი პასუხისმგებლობით;

დ) აქვე, საყურადღებოა „ადგილობრივი თვითმმართველოს შესახებ" საქართველოს ორგანული კანონის მე-15 მუხლის მე-3 პუნქტის დებულება, რომლის თანახმად, დაუშვებელია თვითმმართველი ერთეულის მიერ საკუთარ უფლებამოსილებათა იმგვარად გამოყენება, რამაც შეიძლება გამოიწვიოს საქართველოს საკანონმდებლო აქტის მოთხოვნათა დარღვევა, სახელმწიფო ორგანოების, აგრეთვე ორგანიზაციებისა და დაწესებულებების გამართული ფუნქციონირების შეფერხება ან საფრთხე შეუქმნას მოქალაქეთა კონსტიტუციური უფლებებისა და თავისუფლებების განხორციელებას.

ყოველივე ზემოაღნიშნულის გათვალისწინებით, გვსურს ხაზი გაესვას იმ გარემოებას, რომ საქართველოს ეკონომიკისა და მდგრადი განვითარების სამინისტროს, რომც გააჩნდეს სურვილი შპს „თბილისის სატრანსპორტო კომპანიაში" ქ. თბილისის თვითმმართველი ერთეულის საკუთრებაში არსებული 100%-იანი წილის სახელმწიფო საკუთრებაში გადაცემის თაობაზე, სამწუხაროდ, სამინისტროს არ გააჩნია აღნიშნულის განხორციელების არანაირი სამართლებრივი საფუძველი"- ნათქვამია გიორგი კვირიკაშვილის წერილში.