1-ლი სექტემბრიდან სახელმწიფო დამატებით დაახლოებით მილიონ ადამიანს დააზღვევს. შესაბამისად, ჯანმრთელობის დაზღვევით მოსარგებლეთა რაოდენობა მთლიანობაში 2.4 მილიონს მიაღწევს, აქედან გამომდინარე, აქტუალური ხდება მედიაციის სამსახური, რომელიც დაზღვეულთა უფლებებს დაიცავს და სადაზღვევო კომპანიასა და სამედიცინო დაწესებულებას შორის ურთიერთობებს დაარეგულირებს. მედიაციის ერთ-ერთი უმთავრესი ამოცანაა დაზღვეული მოქალაქეების განცხადებები განიხილოს და ეფექტურად გადაწყვიტოს წარმოშობილი დავები.
ჯანდაცვის სამინისტროს ინფორმაციით, სადაზღვევო კომპანიებსა და სამედიცინო დაწესებულებებს შორის სამართლებრივი ურთიერთობების მოწესრიგება შედეგად მოიტანს იმას, რომ სადაზღვევო კომპანიები დროულად მოახდენენ სამედიცინო დაწესებულებებთან ფინანსურ ანგარიშსწორებას. ეს კი მნიშვნელოვანია, რათა სამედიცინო დაწესებულებებმა ერთის მხრივ, პაციენტებისათვის ხარისხიანი სამედიცინო მომსახურების მიწოდება, ხოლო მეორეს მხირვ, მედპერსონალისათვის შრომის დროული ანაზღაურება უზრუნველყონ.
