აშშ, იტალია, საფრანგეთი, გერმანია, პორტუგალია, ბელგია, იაპონია, ავსტარლია, სომხეთი, აზერბაჯანი, ესტონეთი, ლატვია, მოლდოვა, პოლონეთი - ეს იმ ქვეყნების არასრული ჩამონათვალია, რომელთა მცხოვრებლებიც თავს საქართველოს მოქალაქეებზე ნაკლებად დაცულად გრძნობენ. „რამდენად უსაფრთხოდ ხართ გვიან ღამით სეირნობისას", - ამ კითხვაზე კვლევის 181 567-მა მონაწილემ სხვადასხვაგვარად უპასუხა. გამოკითხვა პირისპირ ინტერვიუს ფორმატში ჩატარდა, მასში მონაწილეობა 15 წელზე მეტი ასაკის მოქალაქეებმა მიიღეს. როგორც კვლევამ ცხადყო, უსაფრთხოების საშუალო მაჩვენებლი 57%-ია, ევროპის ქვეყნებისა - 65%; პოსტსაბჭოთა ქვეყნებში დაცულობის განცდა 51%-ს აქვს, საქართველოს მოქალაქეთა შორის კი უსაფრთოების შეგრძნება 91%-ს აჭარბებს.

შედეგების მიხედვით, 143 ქვეყნის მოქალაქეთა შორის, დაცულობის განცდა მამაკაცებს მეტად აქვთ, ვიდრე - ქალებს. ევროპული მაჩვენებლით, კაცების 75% და ქალების მხოლოდ 55% აქვს უსაფრთხოების შეგრძნება. საქართველოს მონაცემი ამ მხრივაც მაღლია - მოქალაქეები სქესის მიუხედავად, საქართველოში თავს დაცულად გრძნობენ, მამაკაცთა 93 % და ქალთა 90 % მიიჩნევს, რომ გვიან ღამით ქალაქის ქუჩებში სეირნობა სრულიად უსაფრთხოდ შეუძლიათ.
კვლევის შედეგების მიხედვით, საქართველო, როგორც მოქალაქეთა მიერ აღქმული ყველაზე უსაფრთხო ქვეყანა, ერთ-ერთ მოწინავე პოზიციებზეა. საქართველოში მოქალაქეთა უსაფრთხოების განცდის დონე აღემატება როგორც სამხრეთ კავკასიის ქვეყნების შესაბამის, ასევე ევროპის, აზიის, მსოფლიოსა და პოსტსაბჭოთა სივრცის საშუალო მაჩვენებლებს.

GALLUP World-ის მიერ ჩატარებული გამოკითხვის შედეგები კიდევ ერთხელ ამყარებს „დანაშაულისა და უსაფრთხოების კვლევის" შედეგებს. საქართველოში ,,დანაშაულისა და უსაფრთხოების" კვლევა ჩატარდა 2010, 2011 და 2012 წლებში, მისი შედეგების მიხედვით, საქართველო ევროპის ყველაზე უსაფრთხო ქვეყნად დასახელდა.