"საქართველოს მთავრობის ფიზიკური განადგურება დამონების და ფეხქვეშ გათელვის ტოლფასი იყო", - ამის შესახებ საქართველოს პრეზიდენტმა მიხეილ სააკაშვილმა ახალციხეში სიტყვით გამოსვლისას განაცხადა.
სააკაშვილმა აღნიშნა, რომ 2008 წლის აგვსტოში აუცილებელი იყო ფოთში ჩასვლა ხალხის გასამხნევებლად.
"მახსოვს, გავფრინდით ფოთში და დავიწყე გამოსვლა პირდაპირ ეთერში. რუსებმა რომ დამინახეს პირდაპირ ეთერში, მოახტნენ რამდენიმე ათეულ ბეტეერს და წამოვიდნენ, ბუნებრივია, ჩემს დასაჭერად. მათ გადაუდგა ფოთის შესავლელთან პოლიციის რაზმი და უთხრეს, რომ არ გაუშვებდნენ. რუსებს თან ახლდათ ერთი ქართველი. ჩვეულებრივი, ქართულად მოლაპარაკე. სხვათა შორის, რამდენიმე ასეული ქართველი იყო მათ შეიარაღებულ ჯარებში. ისინი ამზადებენ ხოლმე მე-5 კოლონას - მე-11 არმიის პროტოტიპებს. ბოლო წლებში მოზდოკში ქართველთა რაზმის გაწვრთნა მიმდინარეობს. და ამ ქართველმა უთხრა ჩვენს პოლიციელებს - ნუ გეშინიათ, ჩვენ ფოთში შევალთ, მხოლოდ ერთი ადამიანი გვაინტერესებს, არავის არაფერს დავუშავებთო. პოლიციელმა უპასუხა: ამ შემთხვევაში ის ერთი ადამიანი არის საქართველო. ნამდვილად არასოდეს გავკადნიერდები ისე, რომ ჩემი მოკრძალებული პიროვნების იდენტიფიკაცია გავაკეთო და გავაიგივო საქართველოსთან, მაგრამ საუბარი იყო ეროვნულ სიმბოლოებზე; საუბარი იყო იმაზე, რომ მათთვის საქართველოს მთავრობის ფიზიკური განადგურება იყო ტოლფასი საქართველოს დამონების და ფეხქვეშ გათელვის. და ახლაც რჩება ამის სიმბოლოდ. ახლაც იმიტომ არიან კონცენტრირებული იმაზე, რომ ისინი ვერ ჩათვლიან თავს გამარჯვებულად, სანამ საქართველოს იგივე მთავრობა ჰყავს", - განაცხადა სააკაშვილმა.
