2013 წლიდან ყაზახეთი შავი ზღვის გავლით ხორბლის გატარებაზე უარს იტყვის, - ამის შესახებ განცხადება ყაზახეთის მეხორბლეთა კავშირის პრეზიდენტმა კურლან ტლეუბევამ ვიდეოხიდის ასტანა-მოსკოვი-კიევის მსვლელობისას გააკეთა.
"მინდა განვუცხადო ჩემს კოლეგებს რუსეთსა და უკრაინაში, რომ კიდევ 12 თვეს მოგვითმინონ და 2013 წლიდან აღარასოდეს ვიქნებით შავ ზღვაზე თქვენი კონკურენტები. მე ჩემს სიტყვას არ გადავალ", - აღნიშნა მან
უნდა აღინიშნოს, რომ 2013 წლიდან ან 2014 წლის პირველი კვარტალიდან ბაქო-თბილისი-ყარსის სარკინიგზო მაგისტრალი ამოქმედდება.
"უარს ვიტყვით რუსეთის გავლით ტრანზიტზე. ჩვენ გვაქვს პორტი აქტაუ, ჩვენი ვაგონები კასპიის ზღვის, აზერბაიჯანისა და საქართველოს გავლით გაივლის და ისე მოხვდება თურქეთში", - განაცხადა ტლეუბევამ.
ყაზახეთის მეხორბლეთა კავშირის პრეზიდენტის განმარტებით, 2013 წლიდან, როდესაც შესაბამისი ინფრასტრუქტურა მწყობრში ჩადგება, ყახაზეთი ხორბალს შავი და ბალტიის ზღვების გავლით აღარ გაატარებს.
