გურჯაანის მუნიციპალიტეტის საკრებულომ 2010 წლის ბიუჯეტი დაამტკიცა. ბიუჯეტი 7 402 900 ლარით განისაზღვრა.
როგორც კახეთის საინფორმაციო ცენტრს საკრებულოს საფინანსო-საბიუჯეტო კომისიის თავმჯდომარემ კოტე ნაპირელმა განუცხადა, გასულ წელთან შედარებით ბიუჯეტი გაიზარდა, რაც ტრანსფერის თანხის გაზრდით არის გამოწვეული. წელს გურჯაანის მუნიციპალიტეტი ტრანსფერის სახით 4 226 400 ლარს მიიღებს.
ნაპირელის განმარტებით, ბიუჯეტიდან ძირითადი თანხები ინფრასტრუქტურაზე და სოციალურ პროგრამებზე დაიხარჯება. „გვაქვს სრულიად ახალი მუხლი, რომელიც მუზეუმებისა და მოქმედი კულტურის სახლების სარეაბილიტაციო სამუშაოების დაფინანსებას ითვალისწინებს. ხელფასი მხოლოდ სახანძროს და სამხედრო განყოფილების თანამშრომლებს გაეზარდათ", - აღნიშნა ნაპირელმა.
ბიუჯეტის დამტკიცებამდე საკრებულოს წევრმა „რესპუბლიკური პარტიიდან" პროექტში ცვლილების შეტანა მოითხოვა. კერძოდ, შობადობის გაზრდის მიზნით ბიუჯეტში მრავალშვილიანი ოჯახებისთვის ერთჯერადი დახმარების გასაწევად ხარჯების გათვალისწინება. ასევე, ორსულებისთვის, რომლებსაც არა აქვთ სოციალური დახმარება, მშობიარობის თანხის სრული დაფარვა ბიუჯეტიდან მომხდარიყო. რესპუბლიკელის მოთხოვნა საკრებულომ არ გაითვალისწინა.
