პარლამენტის თავმჯდომარე დავით ბაქრაძის განცხადებით, საქართველოს პატრიარქის ილია მეორის საიუბილეო დღეებისადმი მიძღვნილი ღონისძიებები მისი უწმინდესობისადმი დიდი სიყვარულის გამოხატვა იქნება.
ამის შესახებ მან პარლამენტში სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია მეორეს დაბადების 80 და აღსაყდრებიდან 35 წლისთავისადმი მიძღვნილი ღონისძიებების საორგანიზაციო კომისიის შეხვედრაზე განაცხადა.
მისი თქმით, დღევანდელი შეხვედრის მიზანია შემუშავებული იქნას საზეიმო თარიღისადმი მიძღვნილი ღონისძიებები, სადაც გაზიარებული იქნება სინოდის რეკომენდაციები.
,,ეს ღონისძიებები დაიგეგმება საპატრიარქოსთან და სინოდთან მჭიდრო და ერთობლივი თანამშრომლობის საფუძველზე. ეს ღონისძიებები კიდევ ერთხელ იქნება მისი უწმინდესობისადმი დიდი სიყვარულის გამოხატვა,, - განაცხადა პარლამენტის თავმჯდომარემ.
ამ წუთებში მიმდინარე შეხვედრას ესწრებიან თბილისის მერი გიგი უგულავა, კულტურისა და ძეგლთა დაცვის მინისტრი ნიკა რურუა, ფინანსთა მინისტრი მინისტრი დიმიტრი გვინდაძე, საგარეო საქმეთა მინისტრის მოადგილე დავით ჯალაღანია, კობა სუბელიანი და საპატრიარქოს წარმომადგენლები.
კომისიას პარლამენტის თავმჯდომარე დავით ბაქრაძე ხელმძღვანელობს.
