NDI-ის საზოგადოებრივი აზრის კვლევის მიხედვით, საქართველოს მოსახლეობის 92 პროცენტი მიმდინარე მოვლენებისა და პოლიტიკის შესახებ ინფორმაციას ძირითადად ტელევიზიის საშუალებით იღებს. მიუხედავად იმისა, რომ მოსახლეობას სატელევიზიო არხების ფართო არჩევანი აქვს, ყველა ეროვნული მაუწყებელი (რუსთავი 2, იმედი და საქართველოს საზოგადოებრივი მაუწყებლის პირველი არხი) აღიქმება, როგორც ხელისუფლების ინტერესების გამომხატველი, ხოლო აჭარის ტელევიზიას მთავრობა ფლობს და მართავს. კავკასია და მაესტრო კი აღიქმება, როგორც ოპოზიციის ინტერესების გამომხატველი არხები. ორივე არხი თბილისიდან მაუწყებლობს, მაგრამ არც ერთი მათგანი არ არის ხელმისაწვდომი უმეტესი საკაბელო ან სატელიტური ქსელების საშუალებით. საქართველოს საზოგადოებრივი მაუწყებლის მეორე არხი, რომელიც სხვადასხვა პოლიტიკური ძალისთვის ფართო საზოგადოებაზე უფრო თანაბარი ხელმისაწვდომობის უზრუნველყოფის მიზნით დაარსდა, საკმარისად არ ფინანსდება და ქვეყნის დიდ ნაწილში ხელმისაწვდომი არ არის.
ეროვნულ-დემოკრატიული ინსტიტუტის წინასაარჩევნო დელეგაციის ანგარიშში აღნიშნულია, რომ 2011 წლის მიწურულს ბიძინა ივანიშვილმა მეცხრე არხის მაუწყებლობის აღდგენის განზრახვის შესახებ განაცხადა. არხმა 2012 წლის გაზაფხულზე მაუწყებლობა საკაბელო და სატელიტური სიგნალის მეშვეობით დაიწყო, მაგრამ მთავარმა საკაბელო ოპერატორებმა არხი მაუწყებლობიდან ამოიღეს.
"მედიაგარემოს შესახებ მიმდინარე დისკუსიის შედეგად, ქართულმა სადამკვირვებლო ჯგუფებმა საქართველოს პარლამენტს თხოვნით მიმართეს, მიეღო კანონი, რომელიც საკაბელო ოპერატორებს ქართული მაუწყებლებისა და სატელევიზიო არხების უფრო მრავალფეროვანი არჩევანის შეთავაზებას დაავალდებულებს. "Must carry"-ის დებულება ქართველი ამომრჩევლისთვის არჩევნებამდე ინფორმაციის მიღებას უფრო ხელმისაწვდომს გახდის. საქართველოს პარლამენტი ამ ინიციატივას, სავარაუდოდ, დღეს მიიღებს. თანამდებობის პირებმა, რომლებსაც დელეგაცია შეხვდა, აღნიშნეს, რომ არ ელიან რაიმე ტექნიკურ ბარიერებს, რომელიც აღნიშნული კანონის აღსრულების უმიზეზო გაჭიანურებას გამოიწვევს.
საზოგადოებრივი მაუწყებელი და სხვა არხები ოფიციალური 60-დღიანი წინასაარჩევნო კამპანიის დროს დებატების გამართვას აპირებენ", - აცხადებენ ეროვნულ-დემოკრატიული ინსტიტუტში.
შეგახსენებთ, რომ ანგარიში მომზადებულია ეროვნულ-დემოკრატიული ინსტიტუტის (NDI) საერთაშორისო დელეგაციის მიერ, რომლის წევრები არიან: რობინ კარნაჰანი, მისურის შტატის მდივანი; სემ გეჯდენსონი, აშშ-ის კონგრესის წარმომადგენელთა პალატის ყოფილი წევრი; პერ ეკლუნდი, საქართველოში ევროკავშირის დელეგაციის ყოფილი ხელმძღვანელი; კენეთ ვოლაკი, NDI-ის პრეზიდენტი და ლუის ნავარო, NDI-ის საქართველოს ოფისის დირექტორი.
დელეგაციის მიზანი იყო ოქტომბრის საპარლამენტო არჩევნებისთვის მზადების ზუსტი და მიუკერძოებელი შეფასება, ზოგადი პოლიტიკური გარემოს ანალიზი და იმ ფაქტორების შესწავლა, რომელსაც საარჩევნო პროცესზე გავლენის მოხდენა შეუძლია. ვიზიტის მიზანი ასევე იყო, გაეცა რეკომენდაციები, რომელიც მშვიდობიანი, სანდო არჩევნებისთვის დიალოგს და კონსენსუსის მიღწევას შეუწყობს ხელს და აამაღლებს ამომრჩევლის ნდობას იმასთან დაკავშირებით, რომ არჩევნები ხალხის ნებას გამოხატავს.
