საქართველოს მხრიდან ხელშეკრულებას ხელი მოაწერეს საქართველოს ფინანსთა მინისტრმა დიმიტრი გვინდაძემ, ავსტრიის მხრიდან UniCredit Bank Austria AG-ის მმართველმა დირექტორმა ქალბატონმა ფლორენს ვერდისჰეიმმა (Florence Werdisheim). აღნიშნული თანხა მოხმარდება გოდერძის უღელტეხილზე სათხილამურო ინფრასტრუქტურის მოწყობას, რაც ითვალისწინებს 1.7 კილომეტრიანი გონდოლას ტიპის (Gondola) და 1.9 კილომეტრიანი ღია ტიპის (Chairlift) სათხილამურო საბაგიროების დამონტაჟებას. სათხილამურო ტრასების საერთო სიგრძე დაახლოებით 11 კმ-ს მიაღწევს.

პროექტს ავსტრიული კომპანია DOPPELMAYR, განახორციელებს, რომელთანაც შესაბამისი ხელშეკრულება მიმდინარე წლის 8 ივნისს უკვე გაფორმდა. სათხილამურო საბაგიროები არის ნაწილი იმ მასშტაბური პროექტისა, რომელიც გულისხმობს მაღალი დონის საკურორტო ზონის განვითარებას აჭარის მაღალმთიან რეგიონში. კერძო ინვესტიციების მხარდაჭერით, აღნიშნულ საბაგიროებთან ერთად დაგეგმილია სასტუმროების, კოტეჯების, რესტორნების, კაფეების და სხვა ტურისტული, რეკრეაციული და სპორტული ობიექტების განვითარება. შეიქმნება ყველა პირობა იმისათვის, რომ უზრუნველყოფილი იქნას დამსვენებლის კომფორტი და გაიზარდოს რეგიონის მიმზიდველობა როგორც საერთაშორისო ტურისტებისათვის ისე ადგილობრივი დამსვენებლებისათვის. რეგიონის უნიკალური კლიმატური და ბუნებრივი პირობები, აგრეთვე სიახლოვე აჭარის სხვა ზღვისპირა ტურისტულ ცენტრებთან, ხელს შეუწყობს კურორტის სწრაფ განვითარებას და მის ფუნქციონირებას არა მხოლოდ ზამთრის პერიოდში, არამედ მთელი წლის განმავლობაში. პირველ დამსვენებელს ახალი კურორტი 2012 წლის ბოლოსთვის მიიღებს.

აჭარაში ახალი სამთო საკურორტო ზონის მოწყობა ბიძგს მისცემს გოდერძის და მთლიანად, აჭარის რეგიონის ეკონომიკურ, სოციალურ და ტურისტულ განვითარებას. ამ ყველაფრის ბენეფიციარი, უპირველეს ყოვლისა, იქნება ადგილობრივი მოსახლეობა, ვინც ისარგებლებს დასაქმების და ბიზნესის კეთების ახალი შესაძლებლობებით.