"ქართული დასის" ლიდერი ჯონდი ბაღათურია, მინისტრებს კორუფციის ბრალდებით, პრეზიდენტის წინააღმდეგ მოკვლევის დაწყების შესახებ ინფორმაცის სთხოვს.
ბაღათურიამ, შინაგან საქმეთა და იუსტიციის მინისტრებს, პარლამენტის დღევანდელ რიგგარეშე სხდომაზე პრემიერ-მინისტრის გამოსვლის შემდეგ, სხვა კითხვებიც დაუსვა.
"რა ეტაპზეა ქიმერიძის მკვლელობის საქმის გამოძიება? რატომ ხდება, რომ პოლიციის გამჭვირვალე შენობებიდან ადამიანები კიბეებიდან ვარდებიან? რა განსხვავებაა თარგამაძის დროს ფანჯრებიდან ვარდებოდნენ ადამიანები თუ, ახლა კიბეებიდან? სიბაშვილის წინააღმდეგ მიმდინარეობს თუ არა მოკვლევა, რომელსაც ჟურნალისტი სოფო ნიკოლაიშვილი და მისი ადვოკატი გაუპატიურებასა და სხვა სახის ძალადობაში დებენ ბრალს? დაწყებულია თუ არა მოკვლევა, ჩემი წარმოდგენილი ბრალდებით, სამეგრელო-ზემო სვანეთის ყოფილი გუბერნატორის, ზაზა გოროზიას, მისი ძმის, ზაალ გოროზიასა და მისი სანათესაოს წინააღმდეგ, რომლებიც კორუფციასა და პროტექციონალიზმში არიან მხილებული და ამაში დიმიტრი შაშკინიც მონაწილეობდა", - იკითხა ჯონდი ბაღათურიამ.
მას სხდომის წამყვანმა, პარლამენტის თავმჯდომარის პირველმა ვიცე-სპიკერმა მიხეილ მაჭავარიანმა მიკროფონი იმ მიზეზით გამოურთო, რომ ის განსახილველ საკითხზე არ მსჯელობდა.
"ბატონო ჯონდი, ახლა მთავრობის პროგრამაზე ვმსჯელობთ", - განუცხადა ვიცე-სპიკერმა ბარათურიას.
დეპუტატების შეკითხვებს პრემიერი შესვენების შემდეგ უპასუხებს.