საგარეო საქმეთა მინისტრი გრიგოლ ვაშაძე, პრეზიდენტის მიერ, უცხოური საელჩოების თანამშრომლების კრიტიკას ეთანხმება. როგორც მინისტრმა, პრეზიდენტ მიხეილ სააკაშვილის მიერ, უცხოური საელჩოების მიმართ გაკეთებული კრიტიკული განცხადების კომენტირებისას აღნიშნა, საქართველოს მოქალაქეებს ვიზაზე ხშირად გაუმართლებლად ეუბნებიან უარს.
მისი თქმით, საკონსულო დეპარტამენტში მუდმივად შედის საქართველოს მოქალაქეების საჩივარი იმაზე, რომ ზოგიერთ საელჩოში, ვიზაზე გაუმართლებლად უთხრეს უარი, ან გაუწელეს პასუხის გაცემა, ან უდიერად მოექცნენ.
,,ზოგიერთ საელჩოში, არ აქვთ სწორი გაგება იმისა, თუ რას ნიშნავს სავიზო რეჟიმის ჩვენთან დადებული ხელშეკრულება. ჩვენ ჩვენი მოქალაქეების ინტერესებს არავის არ შევალახვინებთ. როგორც კი ჩვენთან - საკონსულო დეპარტამენტში შემოდის საჩივარი, საქართველოს საგარეო საქმინისტრო სწორედ იმისთვისაა, რომ მოქმედებს. ასეთ დავალებებს პრეზიდენტი ხშირად გვაძლევს", - განაცხადა მინისტრმა.
გუშინ, საქართველოს პრეზიდენტმა მიხეილ სააკაშვილმა, თბილისის საინფორმაციო ცენტრში სტუმრობისას საქართველოში უცხოური საელჩოების თანამშრომლებსა და ძველ ბიუროკრატიულ სახელმწიფო აპარატს შორის პარალელები გაავლო.
"მიდით ზოგიერთ უცხოურ საელჩოში, თბილისის ცენტრში ვიზის ასაღებად და ნახეთ, როგორ ეპყრობიან იქ მისულ მოქალაქეებს, უცხოელებიც და სხვათა შორის, მათი ქართველი თანამშრომლებიც. რატომ ეპყრობიან იცით ასე - ჰგონია, რომ ის არის უფროსი და მას შეუძლია დაგამციროს, ზემოდან ქვემოთ დაგხედოს და ამით სიამოვნება მიიღოს. ასეა ბევრ ქვეყანაში. ეს ხდება ჩვენს საელჩოებში, უცხოურ საელჩოებში, მათ შორის - განვითარებული ევროპული ქვეყნების",- განაცხადა მიხეილ სააკაშვილმა.
