"დემოკრატიული მოძრაობის" ლიდერის, ნინო ბურჯანაძის განცხადებით, პრეზიდენტის განცხადებები, რომელიც მან ყოველწლიური მოხსენებით გამოსვლისას გააკეთა, მოწმობს იმას, რომ მიხეილ სააკაშვილი ხელისუფლებიდან წასვლას არ აპირებს. როგორც მან "ჯი-ეიჩ-ენთან" საუბრისას განაცხადა, სააკაშვილმა დაადასტურა, რომ "ნაციონალური მოძრაობა" კიდევ დიდი ხნის განმავლობაში უნდა დარჩეს ხელისუფლებაში.
"ჩემთვის მოულოდნელი არაფერი ყოფილა პრეზიდენტის გამოსვლაში. ვფიქრობ, რომ იმ ადამიანებისთვის, ვინც ჯერ კიდევ ილუზიებში არიან და ჰგონიათ, რომ სააკაშვილი აპირებს მოიქცეს ჯორჯ ვაშინგტონივით და დატოვოს თანამდებობა, სრულიად ნათელი უნდა გამხდარიყო ის, რომ სააკაშვილი ნამდვილად არსად აპირებს წასვლას. მან პირდაპირ გააკეთა განცხადება იმასთან დაკავშირებით, რომ "ნაციონალური მოძრაობა" კიდევ მრავალი წლის განმავლობაში უნდა დარჩეს ხელისუფლებაში. მეტიც, ის მართალია თავს იკავებდა, მაგრამ ბოლოს მაინც გამოჩნდა, რომ ის ყველაფერს გააკეთებს, რომ არჩევნები მოიგოს "ნაციონალურმა მოძრაობამ". ჩემთვის სრულიად ცხადია, რომ საქართველოს პრეზიდენტი და ნაციონალური მოძრაობა არანაირად არ აპირებენ დემოკრატიული საარჩევნო გარემოს უზრუნველყოფას. ასევე არ აპირებენ რეალური კონკურენციის რეჟიმში იმუშაონ და დატოვონ ხელისუფლება", - განაცხადა ბურჯანაძემ.
პარლამენტის ყოფილი თავჯდომარის თქმით, სააკაშვილმა ასევე დაადასტურა, რომ ნატო-ში გაწევრიანების პერსპექტივა დიდ დროს მოიცავს.
"საქართველოს პრეზიდენტმა დაადასტურა ის, რაც მე არაერთგზის მითქვამს და რისთვისაც არადასავლური ორიენტაციის ადამიანად მომნათლეს. მე ვთქვი, რომ ნატო-ში გაწევრიანების პერსპექტივა ძალიან დიდი ხნის და განუსაზღვრელი ვადით იქნა გადადებული. გუშინ საქართველოს პრეზიდენტმა პირველად გააკეთა განცხადება იმასთან დაკავშირებით, რომ ნატო-ში გაწევრიანება ეს არ არის დღევანდელი და ხვალინდელი დღის პერსპექტივა და ის ბევრი წლის შემდგომ მოსალოდნელი პერსპექტივაა. თუმცა მას არაფერი არ უთქვამს, რომ ნატო-ში გაწევრიანების პერსპექტივის გადადება სწორედ მისი დამსახურებაა აგვისტოს ომში ქევყნის ჩართვის გამო", - აღნიშნა ბურჯანაძემ.
ბურჯანაძე სააკაშვილს აკრიტიკებს იმის გამოც, რომ მას არაფერი უთქვამს ქვეყნისთვის ისეთი მნიშვნელოვანი საკითხების შესახებ, როგორიც არის ეკონომიკა, მომავალი თაობის პრობლემები და განათლების საკითხი.
"ერთადერთი ის შემოაფარგლა 53-ე სკოლის ყოფილი მოსწავლის მიმართ უდანაშაულობის პრეზუმფციის დარღვევით. მან პრაქტიკულად დაადასტურა ის, რაც ჩვენმა პარტიამ რამდენჯერმა განაცხადა ამ ბავშვთან დაკავშირებით. როდესაც ჩვენ ვცდილობდით, მას პრობლემების მოგვარებაში დავხმარებოდით და განვაცხადეთ, რომ როგორც ჩანს, სახელმწიფო პოლიტიკაა ასეთი, რომ ეს ბავშვი უნდა დაისაჯოს სამაგალითოდ და მას ელემენტარულად სწავლის გაგრძელების საშუალება არ უნდა მიეცეს. ეს გუშინ დადასტურდა საქართველოს პრეზიდენტის გამონათქვამებში", - აღნიშნა "დემოკრატიული მოძრაობის" ლიდერმა.
ის წუხილს გამოთქვამს იმის გამო, რომ საპარლამენტო დებატებში არ ყოფილა პოლიპატიმრებისა და 26 მაისის თემა.
"საქართველოს პრეზიდენტს, რომელიც მთელ მსოფლიოს ეუბნეოდა, რომ ქვეყანა გადატრიალების და რუსეთის ინტერვენციის საფრთხეს გადაურჩა 26 მაისსო, გუშინ საერთოდ არ უხსენებია ეს მოვლენა. თუ ასეთი უზარმაზარი საფრთხე მოაცილეს და ქვეყანა დაღუპვას გადაარჩინეს, მაშინ ალბათ ამ თემასთან დაკავშირებითაც რაღაც უნდა თქმულიყო. სამწუხაროა, რომ ვერც ოპოზიციამ ვერ მონახა დრო, ეხსენებინა თუნდაც 42 პოლიტპატიმარი, რომელიც მარტო 26 მაისის შემდგომ არის დაპატიმრებული. მხოლოდ საკუთარი თანაპარტიელების 2 გვარის ხსენებით შემოიფარგლნენ და სამწუხაროდ შესაბამისი შეკითხვებიც არ იყო დასმული ამ საკითხებთან დაკავშირებით", - განაცხადა ბურჯანაძემ.
მისი განმარტებით, სააკაშვილმა კიდევ ერთხელ დაადასტურა, რომ ქვეყანაში ცვლილებები მხოლოდ ხალხის ხელით შეიძლება მოხდეს.
"ჩვენი ხელისუფლება, დიახ რომ, ხალხმა შეცვალოს. ეს გუშინ დაადასტურა სააკაშვილმა, როდესაც თქვა, რომ შეცდომაა, როდესაც ადამიანები ელოდებიან, რომ რომელიმე გუდიანი ქალი ან კაცი მოვა და სააკაშვილს სახლში წაიყვანს. სააკაშვილს ნამდვილად ვეთანხმები სიტყვებში, რომ მისი შეცვლის გადაწყვეტილება ხალხმა უნდა მიიღოს. ზოგიერთი ოპოზიციონერი სააკაშვილს უფრო უსმენს ხოლმე, ვიდრე ბურჯანაძეს და მოსახლეობას და ამაში მაინც თუ გაიგონებენ სააკაშვილის ნათქვამს, ცუდი არ იქნებოდა", - აღნიშნა ბურჯანაძემ.