საქართველოს იუსტიციის სამინისტროს ეროვნული არქივის ახალი გამოცემის "საეკლესიო მოხატული ხელნაწერი წიგნების" პრეზენტაცია 22 დეკემბერს 14:00 საათზე საგამოფენო დარბაზში გაიმართება.
ღონისძიებას ეროვნული არქივის გენერალური დირექტორი თეონა იაშვილი გახსნის.
წიგნში წარმოდგენილია საქართველოს ეროვნულ არქივში დაცული სასულიერო შინაარსის 22 მოხატული ხელნაწერის 67 ილუსტრაცია. ქართულ ხელნაწერთა ეს მცირე ნაწილიც ცხადყოფს მათ მნიშვნელობას ქართული კულტურის ისტორიისათვის და დასტურებაა იმ დიდი ისტორიულ-კულტურული ღირებულებისა, რომლითაც გამოირჩევა ძველი საქართველოს კალიგრაფიული და მხატვრული მემკვიდრეობა.
გამოცემაზე მუშაობის პროცესში დაზუსტდა გიორგი მთაწმინდელის მიერ ნათარგმნი ოთხთავის გადაწერის თარიღი, რომელიც მიჩნეული იყო როგორც XIV საუკუნის ხელნაწერი. სპეციალისტთა დასკვნით, ხელნაწერი გაცილებით ადრეულ XI_XII საუკუნეებშია გადაწერილი.
ეროვნულ არქივში დაცული ყველაზე ადრეული, IX საუკუნის ხელნაწერი, გრაფიკულად შესრულებული გოლგოთის ჯვრით არის შემკული.
სასულიერო შინაარსიის მოხატული ხელნაწერები შექმნილია როგორც მაღალი პროფესიული ოსტატობით გამორჩეული კალიგრაფთა და მინიატურისტთა, ისე ხალხური თვითნასწავლი მხატვრების მიერ. ხალხური შემოქმედების საუკეთესო მაგალითია XVII საუკუნის ლექსად თქმული წმინდა გიორგის ცხოვრება, რომელიც უხვადაა შემკული ხალხური მხატვრული წრიდან მომდინარე მინიატურებით.
განსაკუთრებით აღსანიშნავია XVI საუკუნის გულანი, რომელსაც მაღალმხატვრულად შესრულებული 12 სადღესასწაულო მინიატურა ამშვენებს.
წიგნის პრეზენტაციის პარალელურად გაიმართება მოხატული ხელნაწერების გამოფენა.
