ელექტრონული საკომუნიკაციო მომსახურების მიმწოდებლებს - ტელევიზიებს, რადიოებს, ინტერნეტპროვაიდერებს, სატელეფონო კავშირებს - მთავრობის მიერ გამოცემული ნორმატიული აქტით დადგენილი ვალდებულებების შესრულება ეკისრება. "ელექტრონულიო კომუნიკაციების შესახებ" კანონში შესატანი ცვლილებების პროექტი პარლამენტში უკვე შეტანილია.
მოქმედი კანონმდებლობით, ავტორიზებულ პირებს - ტელევიზიებს, რადიოებს თუ ინტერნეტპროვაიდერებს - ელექტრონული კომუნიკაციების სფეროში არსებული კანონმდებლობისა და კომუნიკაციების ეროვნული კომისიის დადგენილებების და გადაწყვეტილებების შესრულების ვალდებულება აქვთ. ახალი კანონპროექტით, მათ ვალდებულება ეკისრებათ, მთავრობის ნორმატიული აქტით დაკისრებული ვალდებულებებიც შეასრულონ.
აღნიშნული საკანონმდებლო ინიციატივა ფრაქცია "ერთობა სამართლიანობისთვის" თავმჯდომარე გიორგი ცაგარეიშვილი ეწინააღმდეგება. მას აინტერესებს, რატომ არ იღებს ამ ცვლილებებზე ხმას მარეგულირებელი კომისია, თუ იგი რეალურად დამოუკიდებელია და იცავს მაუწყებლების ინტერესებს.
"ეს იმას ნიშნავს, რომ სამომავლოდ საქართველოს მთავრობა, მარეგულირებელთან ყოველგვარი შეთანხმების გარეშე, საკუთარი ინიციატივით ისეთ რეგულაციებს დააწესებს, რომელიც მარეგულირებლისთვის და ავტორიზებული პირებისთვის ანუ ტელევიზიებისთვის, რადიოებისთვის და ასე შემდეგ, შესასრულებლად სავალდებულო იქნება. როგორც ჩანს, მოახლოებული არჩევნების პირობებში ხელისუფლება მარეგულირებელ კომისიას და მის შემადგენლობას ბოლომდე აღარ ენდობა და აპირებს, ე.წ. დამოუკიდებელი მარეგულირებელი კომისიის საქმიანოში უხეშად ჩარევის უფლება დაიტოვოს", - აღნიშნა ცაგარეიშვილმა.
