დღეს ფრაქცია “ერთობა სამართლიანობამ” მეცნიერებთან და ხელოვნებათმცოდნეებთან შეხვედრა გამართა. მეცნიერებისა და ხელოვნებათმცოდნეების ნაწილი აცხადებს,
რომ მესტიის მუზეუმის საგანძური კონტეინერებში სათანადოდ არ არის დაცული. მათი მოსაზრებით, მუზეუმთან დაკავშირებული სამუშაო იმ ფარდულიდან, სადაც საგანძურია მოთავსებული, რამდენიმე მეტრის სიახლოვეს მიმდინარეობს და ვიბრაციის გამო ხატებს სერიოზული საფრთხე ემუქრებათ.
მეცნიერების ნაწილს მიაჩნია, რომ საგანძური დაუყოვნებლივ უნდა იყოს გადატანილი ეკლესიაში, რადგან მესტიაში მალე სიცივეები დაიწყება და საგანძური დაუცველი იქნება.
მეცნიერები მესტიის ცენტრის განადგურების საფრთხეზედაც საუბრობენ, რომელიც ისტორიულად, ჯარის შესაკრებელი ადგილი იყო. მათი თქმით, მთლიანად ირღვევა მესტიის კულტურული ღირებულება "დაგრეხილი შუშის შენობით”.
ფრაქციის სხდომას ესწრებოდა “წინააღმდეგობის მოძრაობაც”. მათმა წარმომადგენელმა განაცხადა, რომ მესტიის მუზეუმის საგანძურის გადარჩენის მიზნით “წინააღმდეგობის მოძრაობა” სპეციალურ მიმართვას შეიმუშავებს. ისინი მოითხოვენ, რომ საგანძური დაცულ ადგილას იყოს გადატანილი, კერძოდ, წმინდა გიორგის სახელობის ეკლესიაში.
