აშშ-ის პრეზიდენტმა, დონალდ ტრამპმა განაცხადა, რომ უკრაინის ომის საკითხი მოგვარებასთან ახლოსაა და შეთანხმება შესაძლოა, „მთელ ევროპას“ მოიცავდეს. მისი თქმით, შეთანხმება „დიდი და ლამაზი“ იქნება.
ამის შესახებ ტრამპმა თეთრ სახლში ჟურნალისტებთან საუბრისას განაცხადა. მანამდე აშშ-ის პრეზიდენტი რუსეთის პრეზიდენტის სპეციალურ წარმომადგენელს, კირილ დმიტრიევს შეხვდა.
„ეს იქნება შეთანხმება. დიდი შეთანხმება იქნება და ის უკრაინაზე მეტ საკითხს მოიცავს. შეიძლება ითქვას, რომ შესაძლოა, მთელ ევროპასაც მოიცავდეს. ეს იქნება დიდი და ლამაზი შეთანხმება და ყველა კმაყოფილი დარჩება“, - განაცხადა ტრამპმა.
აშშ-ის პრეზიდენტს არ დაუკონკრეტებია, რა საკითხები განიხილა დმიტრიევთან და რა პირობებს შეიძლება ითვალისწინებდეს მის მიერ ნახსენები შეთანხმება. ტრამპმა ასევე აღნიშნა, რომ იმავე დღეს თეთრ სახლში მყოფ უკრაინის დელეგაციასთან შეხვედრა არ გაუმართავს.
ეს რუსეთისა და აშშ-ის წარმომადგენლებს შორის პირველი პირისპირ შეხვედრა იყო მას შემდეგ, რაც შუალედურ არჩევნებში დემოკრატებმა კონგრესზე კონტროლი მოიპოვეს.
ამასთან, მომდევნო კვირაში აბუ-დაბიში აშშ-ის შუამავლობით უკრაინის, რუსეთისა და შეერთებული შტატების წარმომადგენლების სამმხრივი მოლაპარაკებებია დაგეგმილი. ჯარედ კუშნერის განცხადებით, ბრიუსელში გამართულ შეხვედრებზე უკრაინის, ნატო-სა და ევროპელი პარტნიორების წარმომადგენლებთან განიხილეს უკრაინის უსაფრთხოების გარანტიები და ევროპის უსაფრთხოების უფრო ფართო არქიტექტურა.
