აღნიშნული ხელშეკრულება ითვალისწინებს მსოფლიო ბანკის საერთაშორისო განვითარების ასოციაციის (IDA) მიერ შეღავათიანი საბიუჯეტო სესხის გამოყოფას საქართველოში წარმატებით განხორციელებული რეფორმების მხარდასაჭერად. სესხის ოდენობა 40 მლნ აშშ დოლარია, მისი ხანგრძლივობა - 25 წელი, შეღავათიანი პერიოდი - 5 წელი, საპროცენტო განაკვეთი - წლიური 2%.

აღნიშნულ ხელშეკრულებას ხელი ფინანსთა მინისტრმა დიმიტრი გვინდაძემ და მსოფლიო ბანკის რეგიონულმა დირექტორიმა, სამხრეთ კავკასიაში, ასად ალამმა მოაწერეს.

DPO პროგრამის ფარგლებში, მსოფლიო ბანკი მხარს უჭერს საქართველოს მთავრობის მიერ წარმატებით გატარებულ რეფორმებს შემდეგი მიმართულებებით: სტაბილური და ზრდაზე ორიენტირებული მაკრო-ფისკალური გარემო, სახელმწიფო ფინანსების მართვის ეფექტურობა, სოციალური დაცვის პროგრამების ეფექტურობის გაზრდა და საქართველოს ეკონომიკის კონკურენტუნარიანობის ამაღლება.

„მსოფლიო ბანკის შეღავათიანი საბიუჯეტო დაფინანსება მიზნად ისახავს იმ წარმატებული რეფორმების მხარდაჭერას, რომლებიც ბოლო წლების განმავლობაში საქართველოში მიმდინარეობს. ამ წელს ჩვენ მივიღებთ DPO-ს პროგრამის მესამე ტრანშს, რომლის ოდენობა 40 მილიონ აშშ დოლარს შეადგენს. რეფორმების თვალსაზრისით მნიშვნელოვანი წინსვლაა შედეგზე ორიენტირებული პროგრამული ბიუჯეტის დანერგვის, სოციალური პროგრამების ეფექტურობის ამაღლების, საბაჟო ინფრასტრუქტურის მოდერნიზების, საბაჟო პროცედურების შემდგომი დახვეწის და სხვა რეფორმების მიმართულებით. მინდა ავღნიშნო, რომ გატარებული რეფორმების კუთხით, საქართველო დღეს გამოკვეთილი ლიდერია მსოფლიო ბანკის საერთაშორისო განვითარების ასოციაციის (IDA) ფინანსური მხარდაჭერის მიმღებ ქვეყნებს შორის, რაც განაპირობებს მსოფლიო ბანკის მიერ ზემოაღნიშნული შეღავათიანი რესურსის გამოყოფას," - განაცხადა ფინანსთა მინისტრმა დიმიტრი გვინდაძემ.
შეგახსენებთ, რომ 2009-2010 წლებში საქართველომ ამავე პროგრამის პირველი (DPO I) და მეორე (DPO II) ტრანშების ფარგლებში 90 მილიონი და 51 მილიონი აშშ დოლარის ოდენობის შეღავათიანი დაფინანსება მიიღო.