ევროპის განვითარებისა და რეკონსტრუქციის ბანკის კვლევის მიხედვით, საქართველო მოხვდა იმ ქვეყნების რიგში, სადაც ხალხს სურს მეტი ფულის დახარჯვა იმ სფეროებში, რომლებშიც თავად მიიღებდნენ პირდაპირ სარგებელს.
"სახელმწიფო ხარჯები და ბედნიერება" - კვლევის ამ ნაწილის ფარგლებში რესპოდენტებს კითხვები დაუსვეს დამატებითი სახელმწიფო ხარჯების პრიორიტეტებზე. მიღებული პასუხები საინტერესო ურთიერთობაზე მეტყველებენ საკუთარ ინტერესებსა და ცხოვრების დონით კმაყოფილებას შორის.
"იმ ქვეყნებში, სადაც ხალხს სურს მეტი ფულის დახარჯვა იმ სფეროებში, სადაც თავად მიიღებდნენ პირდაპირ სარგებელს (იმის ნაცვლად, რომ მაგალითად დახმარება გაეზარდოს ღარიბ მოსახლეობას ან გაუმჯობესდეს ეკოლოგიური მდგომარეობა) ნაკლებად ბედნიერი იყო მოსახლეობა. ასეთი ქვეყნებია მაგალითად, რუმინეთი, საქართველო და უნგრეთი. ხოლო იმ ქვეყნებში, სადაც საკუთარი ინტერესების ინდექსი უფრო დაბალი იყო, ბედნიერების დონე უფრო მაღალი აღმოჩნდა. ეს განსაკუთრებით შეეხება შვედეთსა და ტაჯიკეთს", - აღნიშნულია კვლევაში.
შეგახსენებთ, რომ ევროპის განვითარებისა და რეკონსტრუქციის ბანკი "ცხოვრება გარდამავალ პერიოდში" კვლევის შედეგებს ავრცელებს. კვლევა - "ცხოვრება გარდამავალ პერიოდში" - ევროპის რეკონსტრუქციისა და განვითარების ბანკმა და მსოფლიო ბანკმა 2010 წლის ბოლოს ერთობლივად ჩაატარეს. გამოკითხული იქნა დაახლოებით 39 000 რესპოდენტი 34 ქვეყანაში - ბრიტანეთიდან ბალკანეთამდე, ალბანეთიდან უზბეკისტანამდე, უკიდურესი დასავლეთით საფრანგეთიდან უკიდურეს აღმოსავლეთით მონღოლეთამდე. კვლევაში წარმოდგენილია ნათელი დადასტურება იმისა თუ როგორ იმოქმედა გლობალურმა ეკონომიკურმა კრიზისმა და მისმა შედეგებმა ადამიანების ცხოვრებაზე. კვლევის მიზანია, ნათელი გახდეს, რა გავლენა იქონია ბოლოდროინდელმა კრიზისმა და ბერლინის კედლის მოშლიდან ორი ათწლეულის განმავლობაში სოციალურმა, პოლიტიკურმა და ეკონომიკურმა გარდაქმნამ მოქალაქეებზე - განსაკუთრებით ყოფილ კომუნისტურ ქვეყნებში. იგივე კითხვა დაუსვეს მოქალაქეებს დასავლეთ ევროპის ხუთ ქვეყანაში - ბრიტანეთში, საფრანგეთში, გერმანიაში, იტალიასა და შვედეთში.
