საქართველოს პრეზიდენტის ინიციატივით, კულტურული მემკვიდრეობის დაცვის ეროვნულ სააგენტოში არქეოლოგიური მემკვიდრეობის მართვის ცენტრი შეიქმნა.
როგორც "ჯი-ეიჩ-ენს"არქეოლოგიური მემკვიდრეობის მართვის ცენტრის ხელმძღვანელმა იულონ გაგოშიძემ განუცხადა, ცენტრის ერთ-ერთი პრიორიტეტი ქართული არქეოლოგიური ძეგლების პოპულარიზაციისა და საქართველოში არქეოლოგების მოწვევის მიზნით სხვა ქვეყნების სამთავრობო და არასამთავრობო ორგანიზაციებთან ურთიერთობის დამყარება, აგრეთვე, იმ უნივერსიტეტებთან ურთიერთთანამშრომლობა იქნება, რომლებიც თავიანთი სტუდენტების საქართველოში სტაჟირებით არიან დაინტერესებულნი.
"ასევე, არქეოლოგიური მემკვიდრეობის მართვის ცენტრი გეგმავს ყოველწლიური სამეცნიერო-პოპულარული ორენოვანი (ქართულ-ინგლისური) ონლაინ-ჟურნალის გამოცემას. გარდა ამისა საქართველოს კულტურული მემკვიდრეობის დაცვის ეროვნული სააგენტოს ვებ-გვერდზე (http://heritagesites.ge/?lang=eng&page=51) დაწყებულია საქართველოს არქეოლოგიური ობიექტების ანოტაციების განთავსება, რომელთა სრული ვერსიები (რაც ითვალისწინებს სრულყოფილი ინფორმაციის მოწოდებას, ძეგლის აღწერილობას, GPGPS კოორდინატებს, ობიექტის მიმდებარე ტერიტორიაზე არსებული ინფრასტრუქტურის აღწერას) უახლოეს ხანებში გამოქვეყნდება,"- აცხადებს გაგოშიძე.
მისივე განმარტებით, ინვესტიციების, მივლინებისა თუ სტაჟირების განხორციელების შემთხვევაში, ყველა საჭირო იურიდიული პროცედურის შეუფერხებელ მოგვარებას არქეოლოგიური მემკვიდრეობის მართვის ცენტრი უზრუნველყოფს.