უკრაინის საგარეო საქმეთა მინისტრის, ანდრი სიბიგჰას განცხადებით, აშშ-ის, ჩინეთისა და რუსეთის ლიდერების სამმხრივი შეხვედრა ვლადიმირ პუტინს უკრაინის წინააღმდეგ ომის გაგრძელებისკენ უბიძგებს. მისი თქმით, ომის სწრაფად დასრულებას შესაძლოა ხელი შეუწყოს უკრაინის, აშშ-ისა და რუსეთის ლიდერების შეხვედრამ.
„უკრაინის, აშშ-ისა და რუსეთის ლიდერების სამმხრივი შეხვედრა ომის უფრო სწრაფად დასრულებას შეუწყობდა ხელს. რუსეთის, ჩინეთისა და აშშ-ის ლიდერების სამმხრივი შეხვედრა კი საპირისპირო შედეგს გამოიღებს - პუტინს ამ ომის გაგრძელებისკენ უბიძგებს.
პუტინის ასეთ შეხვედრაზე მიწვევა მხოლოდ გააძლიერებდა მის განდიდების მანიას და მიანიჭებდა იმ წონას, რომელსაც ის არ იმსახურებს. ის მსოფლიო ლიდერი კი არა, ომის დამნაშავეა. რუსეთი კი მსოფლიო ძალა კი არა, მსოფლიო პრობლემაა“, - წერს სიბიჰა სოციალურ ქსელ X-ზე.
უკრაინის საგარეო საქმეთა მინისტრის განმარტებით, რუსეთის ეკონომიკა აშშ-ის ეკონომიკაზე სულ მცირე 13-ჯერ, ხოლო ჩინეთის ეკონომიკაზე რვაჯერ მცირეა. ამასთან, მისი თქმით, რუსეთის ეკონომიკა სწრაფად მცირდება და რუსეთში ცხოვრების დონეც ეცემა.
სიბიჰას განცხადებით, წარუმატებელი ომის შედეგად რუსეთმა 1,6 მილიონი სამხედრო დაკარგა დაღუპულებისა და დაჭრილების სახით. მინისტრის შეფასებით, რუსეთი ამ ომს ვერ იგებს და მისი დასრულება არც სურს.
მისივე თქმით, მკაცრი სანქციების ზეწოლის შედეგად რუსეთის ტექნოლოგიები, მრეწველობა და ბიზნესი სტაგნაციას განიცდის.
„ნებისმიერი პრაგმატული თუ მორალური საზომით, პუტინის ადგილი არ არის ერთ მაგიდასთან პრეზიდენტ დონალდ ტრამპსა და სი ძინპინთან“, - აღნიშნავს სიბიჰა.
„ამ ადგილის დაკავების ღირსი ის მხოლოდ მშვიდობისკენ გადადგმული სერიოზული ნაბიჯით შეიძლება გახდეს - მაგალითად, თუ ასეთ შეხვედრამდე ცეცხლის შეწყვეტის შეთავაზებას დათანხმდება. ამის ნაცვლად, საპირისპიროს ვხედავთ: მშვიდობიანი მოსახლეობის წინააღმდეგ ტერორის გაძლიერებას. ვიდრე ეს ტერორი გრძელდება, მას ადგილი არ უნდა ჰქონდეს არც ერთ მოლაპარაკების მაგიდასთან“, - წერს სიბიჰა.
ცნობისათვის, გამოცემა The Wall Street Journal-ი წყაროებზე დაყრდნობით წერს, რომ რუსეთის პრეზიდენტი ვლადიმირ პუტინი მომდევნო თვეში დონალდ ტრამპსა და ჩინეთის ლიდერ სი ძინპინთან შეხვედრის ინიციატივით გამოვიდა. შეხვედრის მიზანი უკრაინაში არსებული ვითარების განხილვა და რუსეთის მიერ უკრაინის წინააღმდეგ დაწყებული ომის მოსკოვისთვის სასარგებლო პირობებით დასრულებაა.
აშშ-ის სახელმწიფო მდივანმა მარკო რუბიომ 18 ოქტომბერს, უზბეკეთში ვიზიტისას, დაადასტურა, რომ აშშ-ის, რუსეთისა და ჩინეთის ლიდერების შესაძლო შეხვედრაზე მოლაპარაკებები მიმდინარეობდა. თუმცა, მას არ დაუზუსტებია, შეთანხმებულია თუ არა შეხვედრა საბოლოოდ.
