დედის მიერ შვილების გატაცებაში დადანაშაულებული მამა აცხადებს, რომ მას ბავშვები არ გაუტაცია. ბავშვის გატაცებაში ეჭვმიტანილი სულეიმან დემირი "რუსთავი 2" - თან ინტერვიუში აცხადებს, რომ ბავშვები არ გაუტაცია. მისი თქმით, პასპორტში არსებობს შესაბამისი ჩანაწერი, რომლის მიხედვითაც ბავშვების საზღვარზე გადაყვანის სრული უფლება ჰქონდა. ბავშვების მამის თქმით, მან არაერთხელ შესთავაზა მის მეუღლეს თურქეთში წასვლა, თუმცა უშედეგოდ. შვილების გარეშე დარჩენილი დედა ბავშვების დაბრუნებას ითხოვს.
"შესაბამისი ჩანაწერი ჩემსავე პასპორტში არსებობს და მე ისინი უკანონოდ არ წამიყვანია. ახლა სტამბულში ვართ და ჩემმა ცოლმა ამის შესახებ იცის. მე ის მიყვარს და არაერთელ შევთავაზე წამოსულიყო. თუ მასაც ვუყვარვარ თურქეთში ის აუცილებლად ჩამოვა. მისი ოჯახის წევრებიც ურჩევდნენ წამოსულიყო, მაგრამ არ მოდის. საქართველოში დაბრუნებას აღარ ვაპირებ და ჩემი შვილებიც კანონის დაცვით ჩემს გვერდით იქნებიან", - განაცხადა დემირმა.
მცირეწლოვანი ალინა და ირაკლი მამამ სტამბულში სარფის საბაჟოს გავლით გადაიყვანა. ოზურგეთში დარჩენილმა ბავშვების დედამ სარჩელით პოლიციას მიმართა, მაგრამ ამ ფაქტზე სისხლის სამართლის საქმე არ აღძრულა.
