28 აპრილიდან 30 ივნისის ჩათვლით, კომპანია "ნატახტარი", პიარსააგენტო "ჯეპრასთან" ერთად, აცხადებს მედიაკონკურსს თემაზე "ადგილობრივი ლუდი - ყოველთვის ახალი", რომლის მიზანია, მედიის საშუალებით მიაწოდოს ქართველ მომხმარებელს სასარგებლო და მიუკერძოებელი ინფორმაცია ლუდის ადგილობრივი წარმოებისა და ლუდის ხარშვის ქართული მრავალსაუკუნოვანი ტრადიციების შესახებ, კონკრეტულად კი, კომპანია "ნატახტარის" სიახლეების, ბრენდების, მისი წარმადობის, ექსპორტისა და ნატახტრის წყლის უნიკალურობის შესახებ. მოცემული კონკურსი გამოავლენს შეჯიბრების მთავარ თემაზე მომზადებულ საუკეთესო მედიაპროდუქციას (საგაზეთო სტატია, ინტერნეტპუბლიკაცია, ბლოგი, ტელე- და რადიოსიუჟეტი და სხვ.).
კონკურსის დამთავრების შემდეგ დაჯილდოვდება 11 გამარჯვებული 4 სხვადასხვა კატეგორიაში: I პრემია - 2000 ლარი (1 ადგილი); II პრემია - 1000 ლარი (2 ადგილი); III პრემია - 500 ლარი (3 ადგილი); IV პრემია - 200 ლარი (5 ადგილი).
კონკურსში მონაწილეობის მიღება შეუძლია საქართველოში მომუშავე ყველა ჟურნალისტს. დაინტერესებულმა პირებმა მიმდინარე წლის 30 ივნისამდე უნდა წარმოადგინონ მედიასაშუალებაში უკვე მოხვედრილი ნამუშევრის 2 ასლი კომპანია "ჯეპრაში" ფაქსით, ელექტრონული ფოსტით ან ადგილზე მიტანით. გამარჯვებულთა დაჯილდოების ცერემონიალი გაიმართება 5 ივლისს.
"ადგილობრივი ლუდი - ყოველთვის ახალი" მედია კონკურსის გამარჯვებულებს გამოავლენს და და მის ობიექტურად ჩატარებას უზრუნველყოფს შემდეგი წევრებისგან შემდგარი ჟიური: ზვიად ქორიძე - ჟურნალისტი, მედია საბჭოს წევრი; რუსუდან ვაშაკიძე - ჟურნალისტიკის დოქტორი, საქართველოს უნივერსიტეტის ასოცირებული პროფესორი, სამაუწყებლო კომპანია "რუსთავი 2"-ის პოლიტიკური თოქშოუს პროდიუსერი; თეონა დოლენჯაშვილი - მწერალი, ლიტერატურული პრემია "საბას" ორგზის ლაურეატი, ჟურნალ "თავისუფალი დროს" რედაქტორი; სოსო გალუმაშვილი - კომპანია "ჯეპრას" უფროსი კონსულტანტი, "თბილისის პიარსკოლის" დამფუძნებელი და ლექტორი; ვახტანგ გვახარია - სამეცნიერო-კვლევითი კომპანია "გამმა კონსალტინგის" პრეზიდენტი, ქიმიის მეცნიერებათა დოქტორი, პროფესორი;
ელდარ ნადირაძე - "ეროვნული მუზეუმის" მთავარი კურატორი, ისტორიის მეცნიერებათა დოქტორი, პროფესორი.
კონკურსის დროს წარმოდგენილი მასალის განხილვისას, ჟიურის წევრები იხელმძღვანელებენ შემდეგი სახის კრიტერიუმებით: ჟურნალისტური ოსტატობა (ორიგინალური ტექსტი, კრეატიული გადაწყვეტა, გზავნილების გასაგებად წარმოდგენა) - მაქსიმუმ 10 ქულა; გამოქვეყნების სიხშირე - მაქსიმუმ 5 ქულა; კონკურსის ფარგლებში მომზადებული მედია მასალების რაოდენობა - მაქსიმუმ 5 ქულა; კონკურსის თემასთან ("ადგილობრივი ლუდი - ყოველთვის ახალი") შესაბამისობა - მაქსიმუმ 10 ქულა.
