ევროკავშირის ქვეყნებთან უვიზო მიმოსვლის რეჟიმის გადასვლის მოსამზადებლად საკანონმდებლო ინიციატივები შემუშავდება. ამის შესახებ იუსტიციის სამინისტროს სამოქალაქო რეესტრის სააგენტოს თავმჯდომარე გიორგი ვაშაძემ პარლამენტის რეინტეგრაციისა და კავკასიის საკითხთა კომიტეტის დღევანდელ სხდომაზე განაცხადა.
მისი თქმით, უვიზო რეჟიმზე გადასვლის ხელშეწყობისათვის, მიგრაციის სამთავრობო კომისიაში საკანონმდებლო ინიციატივებზე მუშაობენ.
საკანონმდებლო ინიციატივები ასევე ქვეყანაში მცხოვრები პირების მოქალაქეობის არქონის გამორიცხვას ითვალისწინებს.
"ჩვენი მიზანია საქართველოში არ იყოს ადამიანი, რომელსაც სტატუსი არ ექნება", - აღნიშნა ვაშაძემ.
ამასთან, მისივე თქმით, ევროპულ კანონმდებლობასთან დაახლოების მიზნით ასევე მოხდება ცვლილებების ინიცირება ორგანულ კანონში მოქალაქეობის შესახებ, თუმცა, მისი თქმით, გათვალისწინებული იქნება ქართული რეალობაც.
