2009-11 წლებში საქართველოს მოქალაქეობაზე უარი მხოლოდ 2479 ადამიანმა თქვა. ამის შესახებ დღეს, პარლამენტის დიასპორისა და კავკასიის საკითხთა კომიტეტის სხდომაზე იუსტიციის სამინისტროს სამოქალაქო რეესტრის სააგენტოს თავმჯდომარის მოადგილე გიორგი გაბრიელაშვილმა განაცხადა.
მისი თქმით, საქართველოს მოქალაქეობიდან გამსვლელთა რაოდენობა 2009-11 წელებში, მოქალაქეობის მიმღებთა რაოდენობაზე 5-ჯერ ნაკლებია.
თუმცა, აქვე გაბრიელაშვილმა აღნიშნა, რომ ხშირად მოქალაქეობიდან გასვლა იმ მიზნით ხდება, რომ პირმა იმ ქვეყნის მოქალაქეობა მიიღოს სადაც იმჟამად ცხოვრობს.
"საზღვარგარეთის ქვეყნებში მოქალაქეობის მისაღებად ხშირად პირველი ქვეყნის მოქალაქეობიდან გასვლის ცნობას სთხოვენ. მას შემდეგ კი რაც პირი უცხო ქვეყნის მოქალაქეობას მიიღებს საქართველოს მოქალაქეობის მინიჭების მოთხოვნით ხშირად ისევ მოგვმართავს", - განმარტა სამოქალაქო რეესტრის სააგენტოს თავმჯდომარის მოადგილემ.
