კომპანია „თელასი" ტრადიციულად აგრძელებს საქართველოს კათოლიკოს-პატრიარქის საქველმოქმედო ფონდის კლასიკური მუსიკის საერთაშორისო ფესტივალის "აღდგომიდან ამაღლებამდე" მხარდაჭერას.
უკვე მე-5 წელია "თელასი" ფესტივალის საპატიო სპონსორია, რომლის მიზანს ახალგაზრდა ქართველი შემსრულებლების შემოქმედების პოპულარიზაცია და საზოგადოების, განსაკუთრებით მომავალი თაობის, სულიერ-კულტურული დონის ამაღლება წარმოადგენს.
მეექვსე საერთაშორისო ფესტივალი "აღდგომიდან ამაღლებამდე" 27 აპრილიდან 2 ივნისის ჩათვლით გაგრძელდება. ფესტივალის პროგრამა წარმოდგენილია ძირითადად კლასიკური მუსიკით. ფესტივალში მონაწილეობას მიიღებს 400-ზე მეტი მუსიკოსი, როგორც უცხოელი, ასევე საზღვარგარეთ და საქართველოში მოღვაწე ცნობილი ქართველი მუსიკოსები.
წელს ფესტივალის სამხატვრო ხელმძღვანელია აშშ-ში მოღვაწე გამოჩენილი ქართველი პიანისტი ალექსანდრე კორსანტია.
კულტურის მოღვაწეთა გამოსვლები თბილისის ვ. სარაჯიშვილის სახელობის სახელმწიფო კონსერვატორიის დიდ დარბაზში და თბილისის დიდ საკონცერტო დარბაზში გაიმართება. სამ კონცერტს საქართველოს რეგიონები - ზუგდიდი (სამეგრელოს რეგიონი), გორი (შიდა ქართლი) და ბათუმი (აჭარა) უმასპინძლებენ.
კლასიკური მუსიკის ფესტივალი სრულიად საქართველოს კათოლიკოს-პატრიარქის საერთაშორისო საქველმოქმედო ფონდმა აკაკი რამიშვილის ფონდ "ტრადიცია და ინოვაციასთან" ერთად 2006 წელს დაარსა და მას შემდეგ ის ყოველწლიურად ტარდება.