ოპოზიციური "რვიანი" საარჩევნო გარემოს გაუმჯობესების საკითხზე მმართველ გუნდთან ჩიხში შესული მოლაპარაკებების შესახებ ინფორმაციას თბილისში ვიზიტით მყოფ ამერიკის შეერთებული შტატების სახელმწიფო მდივნის თანაშემწის მოადგილე თინა ქეიდენაუს აწვდის.
შეხვედრას, რომელიც აშშ-ის საელჩოში რამდენიმე წუთის წინ დაიწყო "ქრისტიან-დემოკრატების", "რესპუბლიკური პარტიის", "თავისუფალი დემოკრატებისა" და "ახალი მემარჯვენეების" ლიდერები გიორგი თარგამაძე, დავით უსუფაშვილი, ირაკლი ალასანია და დავით გამყრელიძე ესწრებიან.
"ჩვენ დაინტერესებულნი ვართ ქვეყანაში პროგრესზე ორიენტირებული ცვლილებებისა, რომლის გზაც აუცილებლად გადის საარჩევნო ყუთზე. აქედან გამომდინარე, ჩვენ ვაპირებთ, რომ ქართული საზოგადოების მხარდაჭერით ჩვენს მოკავშირეებთან გავაგრძელოთ აქტიური მუშაობა და მივაღწიოთ ნორმალურ საარჩევნო გარემოს, სადაც მოსახლეობა მიიღებს არჩევანის დემოკრატიულ შესაძლებლობას", - განუცხადა შეხვედრის დაწყების წინ ჟურნალისტებს გიორგი თარგამაძემ.
დავით უსუფაშვილი კი დარწმუნებულია, რომ თინა ქეიდენაუსთან დღევანდელი შეხვედრა "კიდევ ერთი ნაბიჯი იმისთვის, რომ საქართველოს ხელისუფლებამ მიიღოს სწორი და დროული რეკომენდაციები საერთაშორისო ვალდებულებების შესასრულებლად".
ამერიკის სახელმწიფო დეპარტამენტის დელეგაცია თბილისში დღეს ჩამოვიდა. ვიზიტის ფარგლებში საქართველო-აშშ-ის ქარტიის ფარგლებში შექმნილი დემოკრატიის სამუშაო ჯგუფის შეხვედრები იმართება. ოპოზიციონერ ლიდერებთან აუდიენციის დასრულების შემდეგ ამერიკელი მაღალჩინოსნები მთავრობის კანცელარიაში გადაინაცვლებენ.
