თბილისში ვიზიტით მყოფი ამერიკის შეერთებული შტატების სახელმწიფო მდივნის თანაშემწის მოადგილე თინა ქეიდენაუ ამ წუთებში სამოქალაქო საზოგადოების წარმომადგენლებს ხვდება.
როგორც შეხვედრის დაწყების წინ ჟურნალისტებს გაერთიანებული პროფკავშირების თავმჯდომარემ, ირაკლი პეტრიაშვილმა განუცხადა, საუბარი დემოკრატიის თვალსაზრისით ქვეყანაში არსებულ პრობლემებს შეეხება.
"ამერიკის მთავრობა მხარს უჭერს ისეთი ინსტიტუტების განვითარებას, როგორებიც არის პროფკავშირები. ვისაუბრებთ პროფკავშირების განვითარების თვალსაზრისით შექმნილ პრობლემებზე. ეს ეხება საკანონმდებლო პრობლემებს, კონკრეტული ჩინოვნიკების ჩარევას პროფკავშირების საქმიანობაში. ასევე ვისაუბრებთ იმაზე, თუ რა უნდა გაკეთდეს ადამიანის უფლებების დაცვის თვალსაზრისით", - განაცხადა პეტრიაშვილმა.
ამერიკის შეერთებული შტატების დელეგაცია თბილისს დღეს ესტუმრა. მის ფარგლებში საქართველო-აშშ-ის ქარტიის ფარგლებში შექმნილი სამუშაო ჯგუფის შეხვედრა გაიმართება. იქამდე თინა ქეიდენაუ ოპოზიციის ლიდერებსაც შეხვდება.
