სომალელი მეკობრეების მიერ გატაცებული ქართველი მეზღვაური, 29 წლის გიორგი ჭკადუა საქართველოში დაბრუნდა. როგორც კახეთის საინფორმაციო ცენტრს მეზღვაურის მამამ ოთარ ჭკადუამ განუცხადა, გიორგი თელავის რაიონის სოფელ ვარდისუბანში, სადაც ოჯახი ცხოვრობს, გუშინ ჩავიდა. მეზღვაური ჯანმრთელობის მდგომარეობას არ უჩივის.
შეგახსენებთ, რომ სომალელმა მეკობრეებმა საბერძნეთის დროშის ქვეშ მცურავი სუპერტანკერი „ირენ ეს-ელი" და მასზე მყოფი 25-ვე ადამიანი აპრილის პირველ რიცხვებში გაათავისუფლეს.
29 წლის გიორგი ჭკადუა რიგით მე-17 ქართველი იყო, რომელიც სომალელი მეკობრეების ტყვეობაში აღმოჩნდა. გიორგი ბოლოს ბერძნული კომპანია „ენესელის" მიერ იყო დაქირავებული, რომელიც სუპერტანკერ „ირენ ეს-ელის" მეპატრონე და ოპერატორია. სუპერტანკერთან კავშირი 2011 წლის 9 თებერვალს გაწყდა. მეკობრეები ტანკერს თავს ომანის სანაპიროდან 200 მილის მოშორებით დაესხნენ. 333 მეტრიან სუპერტანკერს კუვეიტიდან ამერიკის შეერთებულ შტატებში 270 ათასი ტონა ნედლი ნავთობი გადაჰქონდა.
