საქართველოს პრეზიდენტი მიხეილ სააკაშვილი საერთაშორისო საავტომობილო ფედერაციის პრეზიდენტ ჟან ტოდტს შეხვდა.
საუბარი საქართველოში ავტოსპორტისა და ქვეყნის განვითარების პერსპექტივებს შეეხო. ინფრასტრუქტურული პროექტების გარდა, ჟან ტოდტი ტურიზმის განვითარებითაც დაინტერესდა. საქართველოს პრეზიდენტისგან მან იმ გეგმებისა და პერსპექტივების შესახებ მიიღო ინფორმაცია, რომლებიც ქვეყანას არა მარტო საავტომობილო სპორტის მოყვარულთათვის გახდის მიმზიდველს.
„5-6 წლის განმავლობაში ჩვენს ქვეყანაში ბევრი რამ შეიცვალა. ინფრასტრუქტურა განადგურებული იყო, მაგრამ დიდი ინვესტიციები განხორციელდა, ძირითადად, უცხოური ინვესტიციები. განვითარდა სასტუმროების ინფრასტრუქტურაც... ამ სამი-ოთხი წლის განმავლობაში, დაახლოებით, ოთხი მილიარდი დოლარის ინვესტიცია ჩაიდო. ექვსი მილიარდი დოლარი მშენებლობას მოხმარდა. დიდი ფინანსური ცენტრები აშენდა არა მარტო თბილისში, არამედ მთელი საქართველოს მასშტაბით. დიდი თანხა დაიხარჯა საავტომობილო გზების კეთილმოწყობაზე", - განაცხადა მიხეილ სააკაშვილმა ტოდთან შეხვედრისას.
მისივე განმარტებით, საქართველოს მეზობელი რეგიონებიდან სამ მილიონამდე ტურისტი სტუმრობს.
„ტურისტების რაოდენობა მალე 10 მილიონამდე გაიზრდება. მათ შორის იქნებიან ტურისტები გერმანიიდან და ევროპის სხვადასხვა ქვეყნებიდან. ახლა ჩამოდიან თურქეთიდან, აღმოსავლეთ ევროპიდან, ყოფილი საბჭოთა რესპუბლიკებიდან, მეზობელი სახელმწიფოებიდან, ირანიდან, ისრაელიდან, თუმცა სამ-ხუთ წელიწადში ამ სიას სხვებიც შეემატებიან და მართლაც საოცარ და მდიდრულ ადგილს ნახავენ. ჩვენ გვაქვს ხუთვარსკვლავიანი სასტუმროები, რაც შავიზღვისპირა სხვა ქვეყნებში, პრაქტიკულად, არ არის. ეს არის კომბინაცია იმისა, რაც ბათუმსა და მისი ტერიტორიის მიმდებარედ ვავითარებთ. ბათუმი იმ არქიტექტორის განახლებულია, რომელმაც ნიცა ააშენა, მაგრამ ეს ქალაქი, გარეგნულად, დუბაის ემსგავსება, ანუ აქ არის ნიცის და დუბაის კომბინაცია. ბათუმიდან 45 წუთის სავალზე ანაკლიის კურორტს ვავითარებთ, რომელიც ასევე შავი ზღვის სანაპიროზე მდებარეობს და მშრალი კლიმატითა და ქვიშიანი სანაპიროთი გამოირჩევა. ასე რომ, კიდევ ერთ მდიდრულ კურორტს ვაშენებთ, რომელიც ნამდვილად იქნება კანისა და ნიცის კომბინაცია", - აღნიშნა საქართველოს პრეზიდენტმა ჟან ტოდტთან საუბრისას.
საერთაშორისო საავტომობილო ფედერაციის პრეზიდენტი საქართველოს ორდღიანი ვიზიტით სტუმრობდა. ჟან ტოდტმა თბილისი წუხელ დატოვა.