Parisien-ის ინფორმაციით, ახლანდელი პრეზიდენტი ხმათა მხოლოდ 20 %-ს მიიღებს და მას სოციალისტური პარტიის სამი კანდიდატი გაუსწრებს. ყველაზე ძლიერ კონკურენტად მიიჩნევა დომინიკ სტროს-კანი (ხმათა 30%), მას მოსდევს ფრანსუა ოლანდი (22%) და მარტინ ობრი (21%).

სარკოზი მეორე ტურში იმ შემთხვევაში გადავიდოდა, თუკი მისი მოწინააღმდეგე სეგოლენ რუაილი (15%) იქნებოდა. რაც შეეხება მარინ ლე პენს, იგი სტაბილურად ხმათა 21-22 %-ს იღებს და მას ელისეის სასახლისთვის ფინალურ დუელში გასვლა მყარად გადაუწყვეტია.
უფრო ადრე ბრიტანელი ექსპეტები ვარაუდობდნენ, რომ თავდაპირველად ლიბიის სამხედრო ოპერაციაში საფრანგეთის მთავარი როლი, სინამდვილეში, სარკოზის მიერ საკუთარი რეიტინგის გადარჩენა იყო. თუმცა აღმოსავლეთში მოპოვებულმა მცირეოდენმა გამარჯვებამ სარკოზის არანაირი პოლიტიკური დივიდენდი არ მოუტანა.

"შეინარჩუნეთ სიმშვიდე, მატჩი ჯერ კიდევ არ დაწყებულა", _ ამშვიდებს სარკოზი თანაპარტიელებს. იგი ცდილობს, დაარწმუნოს მომხრეები, რომ აპრილში მისი არაპოპულარულობის რეკორდი დაინგრევა.