სათაფლიის სახელმწიფო ნაკრძალის 330 ჰექტარზე ტურისტული ინფრასტრუქტურა გაუმჯობესდება. აღნიშნულთან დაკავშირებით ცვლილება შედის ~იმერეთის მღვიმეების დაცული ტერიტორიების შექმნისა და მართვის შესახებ~ კანონში.
როგორც მთავრობის საპარლამენტო მდივანი გია მხუროშვილი განმარტავს, კანონპროექტის მიზანია ნაკრძალის ყველა ტურისტული მარშუტის ათვისება და ინვესტიციების მოზიდვა.
მთავრობის საკანონმდებლო ინიციატივის მიხედვით, სათაფლიის სახელმწიფო ნაკრძალიდან აღკვეთის რეჟიმში მხოლოდ 34 ჰექტარი ტერიტორია გადადის.
დღეს მოქმედი ნორმით, სათაფლიის ნაკრძალი საერთო ფართობით, 354 ჰექტარს შეადგენს.
აღსანიშნავია, რომ კანონმდებლობით, სახელმწიფო ნაკრძალში აღკვეთილი შეიძლება დაარსდეს ეროვნული მნიშვნელობის მქონე ცოცხალი ორგანიზმის ველური სახეობების, სახეობათა ჯგუფების, ბიოცენოზების და არაორგანული ბუნების წარმონაქმნების შესანარჩუნებლად საჭირო ბუნებრივი პირობების დასაცავად, რაც ადამიანის მხრიდან მოითხოვს სპეციალურ აღდგენით და მოვლით ღონისძებებს.
აღკვეთილში მკაცრი კონტროლის პირობებში დაშვებულია ცალკეული განახლებადი რესურსის მოხმარება, ასევე აუცილებლობის შემთხვევაში შესაძლებელია აღკვეთილში მოეწყოს სხვადასხვა ზონა.
სახელმწიფო ნაკრძალი კი შეიძლება დაარსდეს ბუნების, ბუნებრივი პროცესებისა და გენეტიკური რესურსების დინამიკური და ხელუხლებელ მდგომარეობაში შენარჩუნებისა და მათზე უმნიშვნელო ზეგავლენის მქონე მეცნიერული კვლევა-ძიების, საგანმანათლებლო საქმიანობისა და გარემოს მონიტორინგის მიზნით.