სვეტიცხოვლის საპატრიარქო ტაძარში მირონის კურთხევის შემდეგ მრევლს საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ცხუმ-აფხაზეთის მიტროპოლიტმა ილია მეორემ მიმართა. როგორც პატრიარქმა ბრძანა, მირონის კურთხევით საქართველომ დიდი სულიერი სიმდიდრე შეიძინა.
"ყველას გილოცავთ ამ დიდებულ დღესასწაულს. მადლი ღვთისა, მადლი ყოვლადწმინდისა სამებისა და მადლი წმინდა მირონისა იყოს თქვენი და საქართველოს მცველი და მფარველი. დღეს, წმინდა მირონის კურთხევით საქართველომ უდიდესი სულიერი სიმდიდრე შეიძინა. მადლობა უფალს, რომ ღირსი გაგვხადა ამ დიდი საიდუმლოს შესრულებისა. ეს იმას ნიშნავს, რომ საქართველო უძლეველია. საქართველო გამარჯვებული იქნება მომავალშიც და დღესაც. დალოცვილი იყავით თქვენც და საქართველოც", - იქადაგა პატრიარქმა სვეტიცხოველში.
შეგახსენებთ, რომ სვეტიცხოვლის ტაძარში, მირონი დღეს აკურთხეს. ცერემონია თავად უწმინდესმა და უნეტარესმა ილია მეორემ შეასრულა. პატრიარქმა კურთხევის შემდეგ, ფერხთბანის რიტუალი ჩაატარა და უფლის მსგავსად სასულიერო პირებს ფეხები დაბანა.