არასამთავრობო სექტორი განათლების სფეროს დეცენტრალიზაციასა ითხოვს. როგორც დღეს, პარლამენტში ეროვნული უშიშროების საბჭოს წარმომადგენლებთან ეროვნული უსაფრთხოების დოკუმენტის განახლებული რედაქციის განხილვის დროს არასამთავრობო სექტორი წარმომადგენლებმა აღნიშნეს, აუცილებელია დოკუმენტში განათლებას განსაკუთრებული პრიორიტეტი მიენიჭოს.
კერძოდ კი ყურადღება უნდა გამახვილდეს კერძო სექტორის როლის გაზრდასა და სისტემის დეცენტრალიზაციის აუცილებლობაზე, რაზეც შემდეგ განათლების სამინისტრომ თავის პოლიტიკა უნდა ააგოს.
აღნიშნულთან დაკავშირებით, უშიშროების საბჭოს ანალიტიკური დეპარტამენტის დირექტორმა ლაშა დარსალიამ აღნიშნა, რომ დოკუმენტის შესწორებულ ვარიანტში განათლებაზე უფრო ზოგადად იქნება საუბარი.
"დოკუმენტის თავდაპირველ ვარიანტში განათლების საკითხებზე უფრო დაკონკრეტებული იყო, თუმცა შემდგე შეიცვალა და ზოგადი ჩანაწერით ჩანაცვლდა", - აღნიშნა დარსალიამ და აქვე დასძინა, რომ განათლებული საზოგადოება ქვეყნის და მათ შორის სამოქალაქო საზოგადოების განვითარების ერთ-ერთი მნიშვნელოვანი პირობაა და ამ მხრივ კონცეფციაშიც არის საუბარი, თუმცა უფრო მეტი კონკრეტიკა უკვე სამინისტროს პოლიტიკის ნაწილია.
შეგახსენებთ, რომ ეროვნული უსაფრთხოების კონცეფციის დოკუმენტის განახლებული რედაქციის განხილვა პარლამენტში თებერვალში დაიწყო.
ამ დროისთვის დოკუმენტის საბოლოო რედაქციაზე მუშაობა უკვე სრულდება, რომელიც შემდეგ შემდეგ განსახილველად პარლამენტის დაუბრუნდება.