დავით - გარეჯში რეპორტაჟის მოსამზადებლად მყოფ კახეთის საინფორმაციო ცენტრის კორესპონდენტს მონასტერში მოღვაწე ბერებმა მიაწოდეს ინფორმაცია, რომ აზერბაიჯანის ტერიტორიაზე მდებარე სამხედრო პოლიგონი დავით გარეჯის სამონასტრო კომპლექსს საფრთხეს უქმნის.
„აზერბაიჯანის ტერიტორიაზე მდებარე სამხედრო პოლიგონი, რომელიც საბჭოთა კავშირის დაშლის შემდეგ გაუქმდა, ბოლო წლებში კი პერიოდულად ქვემეხებს ისვრიან, დავით გარეჯის და დოდო გარეჯელის მონასტრებს, ჩიჩხიტურსა და ბერთუბანს საფრთხეს უქმნის. ეს პოლიგონი მონასტრებთან გაცილებით ახლოს არის, ვიდრე ალგეთის პოლიგონი", - აღნიშნეს ბერებმა.
კულტურული მემკვიდრეობის დაცვის სააგენტოში ამ საკითხზე კომენტარს არ აკეთებენ.