ტელეკომპანის "რეალ-ტვ" - ის ინფორმაციით, წუხელ, დაახლოებით პირველი საათისათვის ტაძრის აღმოსავლეთ კედელზე წმინდა ნიკოლოზის ხატი გამოისახა.
წმინდანის სახე ღამისთევის ლოცვებისას სწორედ იმ ადგილას გამოისახა, სადაც წმინდა მირონი იხარშება. წმინდა ნიკოლოზი საქართველოს მართლმადიდებელი სამოციქულო ეკლესიის მფარველია. რადგან საეკლესიო ცხოვრებაში მირონის კურთხევა უმნიშვნელოვანესი მოვლენაა, წმინდანმა ხილული სასწაულით საქართველოს ეკლესიის მფარველობა კიდევ ერთხელ გამოხატა.
დღეს დიდი ხუთშაბათია. ამ დღეს უფალმა საიდუმლო სერობაზე თავმდაბლობის მაგალითისთვის მოციქულებს ფეხები დაბანა. სწორედ დიდ ხუთშაბათს დააარსა უფალმა ზიარების საიდუმლო. სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი - უწმინდესი და უნეტარესი ილია მეორე საზეიმო წირვას სვეტიცხოვლის ტაძარში ამ წუთებში აღავლენს. დღესვე საღვთო ლიტურგიის მსვლელობისას წმინდა მირონს აკურთხებენ.
წმინდა მირონს ადამიანს ერთხელ სცხებენ - ნათლობის დროს, რაც სულიწმინდის ბეჭედს წარმოადგენს. ტაძარში მყოფ მორწმუნეებს მხოლოდ დღეს შესაძლებლობა ექნებათ წმ. მირონი კურთხევამდე იცხონ. წმინდა მირონის კურთხევა ავტოკეფალიის ერთ-ერთი მთავარი ნიშანია. ამ უფლებით საქართველოს ეკლესია უძველესი დროიდან სარგებლობს და ეს 15-20 წელიწადში ერთხელ ხდება.
