ბრიტანული კომპანი Hermitage Capital Management-ის წარმომადგენელი თბილისში შეხვედრებს გამართავს. ჯემისონ ფაირსტოუნი საქართველოში გვიან ღამით ჩამოფრინდა. ვიზიტის ძირითადი მიზანი სერგეი მაგნიტსკის შესახებ ფილმის "სამართალი სერგეისთვის" თბილისში დაგეგმილი სამდღიანი ჩვენებაა. მაგნიტსკი Hermitage Capital Management-ის ადვოკატი იყო, როდესაც სამართალდამცველებმა დააკავეს. მაგნიტსკი ერთწლიანი არაადამიანური მოპყრობის შედეგად გაუკრკვეველ ვითარებაში დაიღუპა. ფილმის ჩვენება სხვადასხვა ქვეყნების პარლამენტებში ხდება.
"საქართველოში იმიტომ ჩამოვედი, რომ ქართველ პარლამენტარებს ვუჩვენო ფილმი ჩემი პარტნიორის, სერგეი მაგნიტსკის შესახებ. ის მოკლეს მრავალმილიონიანი რუსული თაღლითური სქემის გამო, რომელიც კრიმინალებთან ერთად შედგენილი იყო რუსეთის მთავრობის მიერ. საქართველო ის ქვეყანაა რომლისთვისაც ადვილი აღსაქმელია რუსული აგრესიის შედეგები. მინდა ეს ფილმი რუსეთისთვის სანქციების დასაწესებლად გამოიყენონ და მოსკოვმა საერთაშორისო სამართლის პატივისცემა ისწავლოს. პირველ ეტაპზე სწორედ ამ ფილმით ვამხელთ რუსეთს", - განაცხადა ჯემისონ ფაირსტოუნმა.
მას შეხვედრები დილიდან პარლამენტში აქვს დაგეგმილი. ის პირველად საგარეო კომიტეტის თავჯდომარე აკაკი მინაშვილს შეხვდება. მოგვიანებით ფაირსტოუნი საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტისა და დიასპორისა და კავკასიის საკითხთა კომიტეტის წევრებს გაესაუბრება. ფილმის ჩვენება, რომელიც ვიზიტის ძირითადი მიზანია, კინოთეატრ "რუსთაველში" 18:00 საათზე დაიწყება. ფილმის დასრულების შემდეგ მიღება ისევ საკანონმდებლო ორგანოში გაიმართება.