სს „კაუკაზუს ენერჯი ენდ ინფრასთრაქჩას" (CEI, GSE: NRGY) ინფორმაციით, მდინარე მტკვარზე დროებითი ხიდის მშენებლობა დასრულებულია. კომპანიის ინფორმაციით, ეს არის მეორე ხიდი რომელიც აშენდა ჰიდროელექტროსადგურის ინფრასტრუქტურული სამუშაოების ფარგლებში. 33 მეტრი სიგრძის დროებითი ხიდის დემონტაჟი ჰიდროელექტროსადგურის ნაგებობების მშენებლობის დამთავრებისთანავე მოხდება და ხიდის მიმდებარე ტერიტორია დაიტბორება.
ხიდი აკავშირებს მდინარე მტკვარის ჩრდილოეთ ნაწილს გაღმა ნაპირთან, სადაც ამჟამად გადამგდები არხის მშენებლობა მიმდინარეობს. ახალი ხიდის მშნებლობის დასრულებამდე სამშენებლო ტექნიკა ძველი ხიდის მეშვეობით გადაადგილდებოდა. თუმცა არსებული ხიდი მძიმე ტექნიკის გადაადგილებისთვის არ იყო გათვალისწინებული და კომპანიის მანქანებს მშენებლობაზე მისასვლელად დასახლებული პუნქტის გავლით უფრო დიდი გზის შემოვლა უწევდათ. ახალი ხიდი ხელს შეუწყობს მიმდინარე სამუშაოების დაჩქარებას და შეამცირებს ტრანსპორტირების ხარჯებს.
„მოხარულნი ვართ, რომ ახალი ხიდის მშენებლობა დავასრულეთ. ხიდი დროის უმოკლეს მონაკვეთში უზრუნველყოფს კომპანიის მუშებისა და ტექნიკის უსაფრხო გადაადგილებას მდინარის სამხრეთ
ნაპირისკენ"- განაცხადა CEI-ს გენერალურმა დირექტორმა არჩილ მამათელაშვილმა.
შეგახსენებთ, რომ სს „კაუკაზუს ენერჯი ენდ ინფრასთრაქჩა" (CEI) წარმოადგენს სააქციო საზოგადოებას, რომელიც შექმნილია საქართველოს მოქმედი კანონმდებლობის თანახმად. წესდების მიხედვით CEI-ს შეუძლია განახორციელოს ინვესტირება ტრანსკავკასიურ კომპანიებში, რომელთა საქმიანობის ძირითად სფეროს წარმოადგენს ელექტროენერგიის და ბუნებრივი აირის წარმოება. ამჟამად, CEI აშენებს ახალციხის რაიონში, მდინარე მტკვარზე (თურქეთის საზღვართან) 46.4 მვ სიმძლავრის
ჰიდროელექტრო სადგურს.