კომპანია "თელასში" საწარმოს რესურსების დაგეგმვის სისტემა (Enterprise Resource Planning System) დაინერგა, რაც საწარმოს შიდა და გარე რესურსების მართვის ინტეგრირებული სისტემაა საინფორმაციო ტექნოლოგიების ბაზაზე. ამ მიზნით დღეს სასტუმრო "რედისონში" კომპანია SAP ERP-ის პრეზენტაცია გაიმართა.
ERP სისტემის დანერგვის მიზანია კომპანიის შიდა საინფორმაციო ნაკადების მართვა. SAP ERP, რომელიც დამყარებულია ცენტრალიზებულ მონაცემთა ბაზაზე, კომპანიის ერთიან სტანდარტულ საინფორმაციო სივრცეს ქმნის.
კომპანია SAP-ის თანამედროვე ERP სისტემის "თელასში" დანერგვის გადაწყვეტილების მიღების უმნიშვნელოვანესი ფაქტორი კომპანიის საქმიანობიდან გამომდინარე ოპერატიული და სანდო ინფორმაციის მიღების მზარდმა მოთხოვნამ განაპირობა. პროგრამა საშუალებას იძლევა, შეფასდეს საქმიანობის მიმდინარე მდგომარეობა და გამოვლინდეს სხვადასხვა ფაქტორების გავლენა საწარმოო პროცესების ეფექტიანობაზე შესაბამისი გადაწყვეტილებების მიღების მიზნით.
პროექტის რეალიზაციის შედეგად სტანდარტიზებულია საბუღალტრო აღრიცხვის, დაგეგმვის, ელექტროენერგიის შესყიდვისა და რეალიზაციის, ასევე, ფინანსების მართვის პროცესები.
პროგრამის დანერგვის შედეგად გაიზრდება კომპანიის საინვესტიციო მიმზიდველობა, ამაღლდება ბიზნეს პროცესების გამჭვირვალობა, გაუმჯობესდება ხარჯების კონტროლი და საფინანსო დისციპლინა, განხორციელდება კომპანიის მიმდინარე ფინანსურ-ეკონომიკური საქმიანობის უფლებამოსილების დელეგირება მენეჯმენტის უფრო დაბალ დონეზე_კონტროლის მექანიზმის ტოპ-მენეჯერებისთვის დატოვების გზით.
შეგახსენებთ, ერთ-ერთი მსხვილი სადისტრიბუციო კომპანია სს "თელასი" ქალაქ თბილისში ელექტროენერგიას აწვდის 450 ათასამდე მომხმარებელს, რომელთაგან 52%-ს მოსახლეობა შეადგენს, 38%-ს _ კომერციული სექტორი, საბიუჯეტო სექტორი და სხვა მომხმარებლები კი ელექტროენერგიის 10%-ს მოიხმარენ.
კომპანია SAP (გერმანია) 1972 წელს დაარსდა. კომპანია სხვადასხვა სპეციალიზაციის ორგანიზაციებს ბიზნესის ეფექტურ მართვაში ეხმარება. მისი სერვისით სარგებლობს 120 ქვეყნის 109 ათასი მომხმარებელი. 2010 წელს კომპანიის კონსოლიდირებულმა შემოსავალმა 12,45 მლრდ. ევრო შეადგინა.
