საქართველო წელს აშშ-ის მთავრობისგან სავარაუდოდ 87 მილიონ აშშ დოლარს მიიღებს. ბიუჯეტით გათვალისწინებული საგარეო დახმარებების საკითხი კონგრესის საგარეო ურთიერთობათა კომიტეტში განიხილეს.
კონგრესმენებმა სხდომაზე სახელმწიფო დეპარტამენტის წარმომადგენელი დანილე როსენბლუმიც მიიწვიეს, რომელიც ევროპისა და ევრაზიის საკითხებს კოორდინირებას უწვევს. შეხვედრის მონაწილეებმა საქართველოს ქვეყნის წარმატებული მოდელი და ამერიკის თანამოაზრე უწოდეს და თქვეს, რომ შტატების მიერ ამ ქვეყანაში ჩადებულ ინვესტიციებს კონკრეტული შედეგები მოაქვს.
კონგრესის წევრებმა განსაკუთრებული აქცენტი 2008 წლის შემდეგ გამოყოფილ ფინანსურ დახმარებებზე გააკეთეს. კონგრესმენთა აზრით, დახმარება მომავალშიც უნდა გაგრძელდეს, რადგან ქვეყანაში გადარიცხული თანხა დემოკრატიული რეფორმების გატარებაზე სწორად და მიზანმიმართულად იხარჯება.
"ჩვენ სწორად უნდა დავხარჯოთ ყოველი დოლარი და იმ ქვეყნებს უნდა დავეხმაროთ, რომლებიც ჩვენი თანამოაზრეები არიან. მხოლოდ ასე შეიძლება ჩვენს მიერ დახარჯული ფული ეფექტური და პროდუქტიული იყოს. მე მივესალმები აშშ-ს მთავრობის მხარდაჭერას საქართველოსადმი, მაგრამ მე ეჭვქვეშ ვაყენებ რუსეთის დახმარებისათვის დახარჯულ 72 მილიონ დოლარს", _ აცხადებს კონგრესმენი დენ ბურტონი.
